Politiit saassussisoqareersoq Birminghamimi tigusarinnittut
Londonimi saassussinerup kingorna politiit Birminghamimi arlalinnik tigusarinnissimapput, nutaarsiassaqartitsivik Reuters, Sky News innersuussutigalugu taama allaaserisaqarpoq.
- Birminghamimi illumut pakasaalluni paasiniaasoqarnerani inuit arlallit tigusarineqarput. Pakasaalluni paasiniaaneq ullaaralaaq pivoq, Sky News taama ilisimatitsivoq.
- Inuit arlallit saviminernik paffequtsikkat aallarunneqarput, takunnittut Sky Newsimut taama oqarput.
- Politiit qanoq iliuuseqarnertik oqaaseqarfigerusunngilaat, Sky News allappoq, tusarfiit atiisigut taaneqanngitsut Birminghamimi pisut Londonimi pingasunngornermi saassussisoqarneranut atassuteqarnerannik oqaaseqarsimanerat innersuussutigalugu.
Birminghamimi aqquserngit arlallit assersorneqartut
Londonimi saassussisoqarnerani inuit ikinnerpaamik sisamat toqutaapput - saassussisoq politiinit aallaaneqarluni toqutaavoq. Ikiligaasut 40-t missaanniipput - ilaallu aqqunartitersimallutik.
Saassussisup kisimiissimanera politiit siornatigut oqaatigaat.
Saassussineq aallartippoq tuluit inatsisartoqarfiata eqqaani ikaartarfimmi Westminster Bridgemi pisuttut Hyundaimik biilertumit aporarneqarmata. Biili kingorna ungaluukkanut aporpoq aquttorlu savilisartoq pisulluni inatsisartoqarfiliarluni.
Saassussisup taartunik atisalersorsimasup politeeq savimmik kapivaa, kingornalu politiimit allamit aallaaneqarluni toqutaavoq.
Tuluit premierministeriat, Theresa May, inatsisartoqarfimmit qimagutsinneqarpoq Downing Streetimilu angerlarsimaffimminukaanneqarluni.
/ritzau/Reuters