Politiit pisortaat: Sivikitsuinnarmi toqutsinerit sisamat ataatsikkukanneq pinerat nalaatsornerinnaavoq

Kalaallit Nunaanni Politiit toqutsinernik suliaat sivikitsuinnarmi sisamaanerat nalinginnaasuunngitsoq, politiit pisortaat oqarpoq. Ataatsikkukannerli pinerat nalaatsornerinnaalluni allanngoriartuummik avaanngunartumik takutitsisuunngitsoq, taanna isumaqarpoq.
Assi © : KNR
Allattoq Mikkel G. Rasmussen
februaarip 15-at 2023 11:44

​Kalaallit Nunaanni Politiit 2023-imi toqutsinernik suliaat sisamarsuulereerput.

Suliaanni taakkunannga pingasut januaarip 31-ata februaarillu arfineq-pingajuata akornanni, tassa ullut qulit ingerlanerinnaanni toqutsinernut tunngasuupput. Sisamaallu angutip toqutsisimalluni politiinut nammineq saaffiginnilluni nassueruteqartumut tunngasuuvoq.

Suliani taakkunani pasineqartut tamarmik politiinit tigusaareerput. Pasisat taakku tamarmik eqqartuussisumut sassartinneqareernerminni tigummigallagaapput.

Taamaakkaluartoq politiit suli ulapaartuarsinnarput.

Uppernarsaatissanimmi toqutsinernik misissuinerminnut pingaarutilinnik ujaasileruttorlutik, politiit pisortaat Bjørn Tegner Bay oqarpoq:

- Toqutsinernik suliatsinni sisamaasuni tamani tamaviaaqaluta misissueqqissaaleruttorpugut. Suliani taakkunani tamani tigummigallagaqarlutalu pasisaqarpugut. Tamaviaaqaluta sapinngisamik amerlanerpaanik maanna uppernarsaatissarsiuleruttorpugut, suliallu sivisussaqaat, politiit pisortaat KNR-imut oqarpoq.

Inunnit paasissutissarsiorneq misissueqqissaarinerisa ilarujussuarisarmassuk sulianut taakkununnga tunngatillugu takunnissimasut tusagaqarsimasulluunniit saaffiginnissasut, politiit suli kajumissaarutigaat.

- Inuit paasissutissiissutaat misissueqqissaarinitsinnut pingaaqaat. Sulianut taakkununnga tunngatillugu pitsaasunik paasissutissarseqaagut, politiit pisortaat oqarpoq.

Toqutsinernik suliat amerlanerat nalinginnaasuunngitsoq

Kalaallit Nunaanni Politiit toqutsinernik suliaat ukiuni kingullerni qulini agguaqatigiisillugit ukiumut tallimaasarput. Taamaammat toqutsinernik suliaat 2023-ip aallartinneraniilli sisamaanerat nalinginnaasuunngitsoq, politiit pisortaat aamma oqarpoq.

Toqutsinermut suliat tunngasut ukioq manna sisamassaat

Nuummi Ceresvejimi blok O-mi januaarip 31-ani ikuallattoqarmat, arnaq 82-inik toqungasoq nassaarineqarpoq.
 
Angut 30-t sinnerlugit ukiulik ikuallatsitsisimasutut toqutsisimasutullu pasineqarluni akunnerni 72-ini tigummigallarneqarpoq. Kingornalu iperagaaqqilluni. sulili pasineqartoq politiit ilisimatitsissutigaat.
 
Angut 20-nik ukiulik Sermersuup Eqqartuussiviani toqutsisimasutut, toqusup timaanut kusananngitsuliorsimasutut ikuallaatitsisimasutullu pasisaalluni arfininngornermi februaarip aqqaneq aappaani sassartinneqarpoq. Ulluni 26-ni tigummigallagassanngortitaavoq..
 
Angut 53-inik ukiulik Qaqortumi inigisamini toqungasoq februaarip sisamaani nassaarineqarpoq.
 
Angutip timaata misissornerata angut nalinginnaasumik toqquteqanngitsoq paasineqarpoq, taamaammat politiit suliamik toqutsisoqarneranik misissuillutik aallartipput.

Allisiguk

 
Angut 34-nik ukiulik Kujalliup Eqqartuussiviani februaarip qulingani sassaartinneqarpoq, toqutsisimasutullu pasisaalluni ulluni 28-ni tigummigallagassanngortitaalluni.
 
Pingasunngornermi februaarip arfineq-pingajuani unnukkut kingusissukkut arnaq 55-inik ukiulik Sisimiuni savimmik kapineqarluni toqutaavoq.
 
Eqqartuussiveqarfik Qeqqata 25-nik ukiulik ulluni 28-nimi tigummigallagassanngortinneqarnissaa februaarip qulingiluaani aalajangerpaa.
 
Angut 35-inik ukiulik Qaqortumi toqutsisimasutut pasineqarluni ulluni 28-ni tigummigallagassanngortinneqarpoq. Taanna siornaak toqutsinermut tunngavoq politiilli itinerusumik oqaaseqarsinnaannginnerarput.
 
Taannali arnamut 35-inik ukiulimmut siornaak Qaqortumi tammaaneqartumut attuumassuteqaratarsinnaavoq.
 
Angutip nammineerluni toqutsisimanini politiinut nalunaarutigaa.

- Soorunami toqutsinernit sisamanik ataatsikkut suliaqaratta tupaatigaarput, taamaanneratali aalassatsinngilaatigut, Bjørn Tegner Bay oqarpoq.

Taakkuli ataatsikkukanneq pinerat nalaatsornerinnaasorigitsik allanngoriartuummillu takutitsisuunertut taassallugit siusippallaarsorigitsik, politiit pisortaata ilanngullugu erseqqissaatigaa.

- Allanngoriartuummik takutitsisuunertut taanissaannut ikippallaaramik taama taassallugit siusippallaarsoraara. Ataatsikkukanneq pinerat nalaatsornerinnaasorineruarput. Kisianni soorunami malunnaateqarput, toqutsinernillu sisamanik ataatsikkukanneq suliaqarnerput soorunami nalinginnaasuunngilaq.

Kalaallit Nunaanni Politiit ukiuni kingullerni qulini ukiumut agguaqatigiisillugit toqqutsinernik tallimanik suliaqartarput. taakkua 2022 naammat toqutsinermik sulianik arfineq pingasunik suliaqarput.

Toqqissiviilliortariaqanngilasi
Politiit pisortaata oqarnera naapertorlugu ulluni makkunani toqqissiviilliortariaqanngilagut.

Toqutsinernik suliat taakku sisamaasut imminnut attuumassuteqanngitsut, politiit pisortaata erseqqissaatigaa. Aamma inunnut ulorianartumik pinerliinerit aqqusiniinnarmi ilisarisimanngisanullu saatsinneqartanngitsut politiit misilittagaraat.

- Pinerluttuliorfigineqartoq pinerluttorlu ilisarisimariikkajupput. Taamaammat inuit toqqissiviilliortariaqanngillat. Pisuttuarujoornissamut illoqarfiliarnissamulluunnit kappiasuttoqartariaqanngilaq. Isumaqaavippunga isumakuluttoqartariaqannngitsoq, Bjørn Tegner Bay oqarpoq.

 

Politiit toqutsinernik suliaqarsinnaasortaqartuaannartut

Politiit toqutsinernik sisamanik ataatsikkukanneq suliaqarnertik peqqutigalugu pisarnermit ulapaarneroqaat.

- Toqutsineq pinerluutini sakkortunerpaavoq. Taamaammat toqutsinernik suliaqaraangatta pisarnermit ulapaarnerusaqaagut. Sapaatillu akunnerini kingullerni marlunni-pingasuni pisarnermit arpasukaarneroqinerput miserratissaanngilluinnarpoq, Bjørn Tegner Bay oqarpoq.

Politiilli arpasukaaraluaqalutik toqutsinernillu sisamanik ataatsikkukanneq misissueqqissaarigaluarlutik pisariaqartitsisunik ikiuiartorasuarnissaminnut suli piareersimalluinnarput.

- Pisariaqartinneqartilluta ikiuiartorasuaannarsinnaajuaannartugut neriorsuutigisinnaakutsoorpara. Pigaartuvut upalungaarsimasuvullu pisarnermisorluinnaq piareersimapput.

Toqutsinernilli suliatik pingaarnerutilluinnartarpaat, taamaammallu suliarikkajutaminnik soorlu tillinniarnermik misissuinermut tunngasunik pisarnermit sivisunerusumik naammassiniarsaraat.

Aamma atuaruk