Politiit pisortaat: Sapaatip-akunnerata naanerani festernasi
Sapaatip-akunnerata naanera aallartiliivippoq. Amerlasuunullu tamanna nuannisarnissamik isumaqarpoq. Amerlasuunullu tamanna tallimanngornermi immiaarartornissamik, nipilersuutit nippaasimaarnissaannik festernissamillu tamanna isumaqarpoq.
Tamannali pinaveersaarneqassasoq, Tunillaassortunik nappaalanersuaqarneranut ataatsimiititaliarsuup siulittaasuata politiillu pisortaata, Bjørn Tegner Bayip oqaatigaa.
- Nuummi innuttaasunut inussiarnersumik qinnuiginninniarpunga: Sapaatip-akunnera naalerpoq festernerillu amerliartulerput. Taamaaliunnginnissassinnik qinnuigerusuppassi, Bjørn Tegner Bay oqarpoq.
- Festernermi immitsinnut qanillivallaartarpugut. Immitsinnullu ungasillisimaartariaqarpagut – taamaammat festernissat utaqqisikkallarsigit.
Maannakkut piffissaq imaannaanngitsuuvoq, qaammatialuit qaangiuppata ulluinnatsinnut uteqqissaagut, politiit pisortaat oqarpoq.
AAMMA ATUARUK ASSILIARTAT: Coronavirusi timimi ima iliortarpoq
Nuummi inuit qulinit amerlanerusut sumiiffimmi ataatsimoornissaat inerteqqutaavoq, unnuami qitigiartarfiit imerniartarfiillu matoqqapput.
Peqatigiiffippassuit aamma matoqqapput, ulluinnarnilu atortussanik pisiniarfiit suli ammapput. Inuit imminnut 2 meterinik ungasitsiginissaat kaammattuutaavoq – tamannali pisiniarfinni malinneqartuaannanngilaq.
- Niuerniartillusi ikiortigut. Pisiniarfiit karsini assersuillutik natermilu nalunaaqutsersuillutik suliniuteqangaatsiarput. Imminut qanillinaveersaaritsi – taamaalillusi tuniluuttoqannginnissaanut ikiuutaassaasi, Bjørn Tegner Bay oqarpoq.