Politiit: Meeqqasi unnuami kisimiitillugit aneertinnasigit
Taamatut nalunaaruteqarneq pivoq sisimiuni umiatsianut tulanngavimmi tillinniarnerit arlallit pereersullu. Tillinniat umiatsianiit aallaasinik, aallaasit imassaannik, orsussanik tigooraasarsimapput aammalu angallatinik aallarussisarsimapput.
Politiit ittuata pigisat nalillit angallatiniitsinneqannginnissaat innersuussutigaa, angallataatillillu kissaateqarfigai:
- Angallataatillit sapinngisamik angallatimi motoorii aallartissinnaajunnaarlugit qimattassagaat aamma soorlu ilaatigut benzinstangi peersinnaappat peerlugu. Taavalu aamma aallaasinik peqqutissanillu umiatsiami tigoriaannarnik inissisimatitseqqunagit, Johan Davidsen qeqqata politiivisa ittuat oqarpoq.
Akisussaaffik eqqaamaqquaa
Politiilli misissuinerisa takutippaat meeqqat ilaat, benzinamik gasimillu naamaartarsimasut.
Taamaattumik Qeqqani Politiit ittuata eqqaamaqquaa angajoqqaatut akisussaaffeqarneq:
- Meeqqat ukiukitsut taamaaliortuusimasut paasivagut. Taamaattumik minnerunngitsumik angallataatilinnut taamatut serlersaarfigineqarsimasunut aammalu angallataannik aallarussisoqarsimasunut nalunaarutiginiarlugu taanna nassiuppara. Aamma ilannguppara angajoqqaanut qinnuteqaatiga imaalillugu, meeqqat ukiukitsut unnuakkut nakkutigineqaratik aneertittarnerat pinaveersaartinniarlugu. Taamaaliuleraangamik tassa aallarussinerit pileraangata ingasatsikkaluttuinnartarmata, Johan Davidsen oqarpoq.
Isumaginninnermik suliaqartut ajornartorsiut pillugu kalerrinneqareerput, Qeqqani politiit ittuat nalunaarpoq.