Politiit matuma silatinnguaniipput qulimiguullillu qulaavaarpalupput
Københavnimi arfininngorneruvoq nalinginnaasoq. Nuummiup Qivioq Kern Kreutzmannip fælledparkenip eqqaani saassussisoqarsimaneranik tusagaqarsimanngilaq najukkamiku eqqaani niuertarfeeqqamut niuerniarpoq. Angerlamulli apuuteriitsiartoq matuata silatinnguani poliit ujaasinerat aallartippoq.
AAMMA ATUARUK Kalaallit Nunaanni Danmarkimisut qiteqqusimassaagut
- Eqqannguatsinniipput. Minutsit 15-it utaqqisimasuuguma inuppassuit akornanniissimassagaluarpunga. Kingornami qulimiguullit qulaavaalerput, politiillu sumi tamaani takussaalerlutik, Qivioq Kern Kreutzmann KNR-imut taama oqarpoq.
Kreutzmann nuummiuuvoq filmiliornermilu ilitsersuisartutut sulinermi saniatigut CBS-imi ilinniartuulluni Københavnimi najugaqarluni.
AAMMA ATUARUK Pisut ataatsimut isigalugit: Arfininngormat unnuarlu eqqaassilluni saassussisoqarnerani ima pisoqarpoq
Upperiuminaappoq
Ukioq ataaseq Nuummeereerluni Københavnimut uteqqammerpoq, najugaqarfigisaalu eqqissisimanartoq tassanngaannaq ajorluinnartumik pisoqarfiuvoq.
- Svanemøllen Stationip eqqaani eqqissisimasumi illuni kolonihavini taamatut ujaasisoqarnera upperiuminaappoq. Annilaarnaqaaq. Allaanngilaq filmi piviusuusaartitaq piviusunngortoq, Qivioq Kern Kreutzmann oqarpoq.
Inuit angerlarsimaannarput
Kreutzmann Københavnimi ulluni kingullerni pisunit sunnertisimasut kisiartarinngilaat.
- Inupassuit quarsaarutigaat eqqissisimasoqarporli. Inuit angerlarsimaannarunarput, aammami taamatut pisoqarnerani pitsaanerpaajugunarpoq.
Pisup kingunerisaanik inuit allamiunut tunuarsimaarnerisa annertusinissaa Qivioq Kern Kreutzmannip neriuutiginngilaa.
AAMMA ATUARUK Københavnimi peqqarniisaarluni saassussisoqarnerani toqutaasut marlunnik ilapput
AAMMA ATUARUK Københavnimi pinerleeriartoqarnerani inuk ataaseq toqutaavoq pingasullu ikiligaallutik
Kalaallinut sunniuteqarnerlussinnaavoq
Inuup allamiutut isikkullip saassussisimanera tusagassiorfitsigut nalunaarutigineqarnera aarlerinartoqarsinnaasoq tikkuarpaa.
- Taamaaliortoqarneratigummi inunnut ikinnerussuteqartunut danskisut isikkoqanngitsunut tamanut sunniuteqassaaq. Ajoraluartumillu aamma kalaallinut. Danmarkimi ilinniartuuninni inuit danskisut isikkoqanngitsut tikilluaqquneqartarnerat allanngoriartortoq malugaara, tamannalu suli annerulissanngitsoq neriuutigaara.
Pasinnikkajulersarput
Inunnik pisumut attuumassuteqanngitsunik pasinnikkajulersartoqartarnera Qivioq Kern Kreutzmanip nammineerluni aamma misigisimavaa.
- Uanni tamanna aamma malugisinnaavara. Danmarkip Radioata nittartagaani angut arabiamiusut isikkulik ujaarineqartoq atuarakku eqqarsarpunga. Arraa, pisiniarfimmi taamatut isikkullip saniani nikorfavunga. Taamaasillunilu arabiamiusut isikkulinnut tamanut sunniuteqarpoq.
- Immaqa uffa pizzamik aatsisartoq eqqissisimasoq pineqartoq. Inuilli ikitsuinnaat taamatut iliuuseqarnerat inunnut tuusintilippassuarnut sunniuteqarpoq, Kreutzmann oqarpoq.