Pisut ataatsimut isigalugit: Arfininngormat unnuarlu eqqaassilluni saassussisoqarnerani ima pisoqarpoq
Peqqarniisaarluni saassussinertut ilimagineqartumi inuit pingasut toqutaapput politiillu tallimat ikiligaallutik.
Allattoq Sandra Meinecke, Elisa Isaksen
Pisut Østerbromi arfininngornermi ualikkut aallartipput. Kulturikkut illorsuarmi Krudttøndenimi ima taaguutilimmik aaqqissuussisoqarpoq: "Eqqumiitsuliorneq, Guutimik mitaatiginninneq aamma killiligaanani oqaaseqarsinnaatitaaneq".
- Nunatsinni nalunaaqutarput naapertorlugu nalunaaqutaq 11.30 angut eqqarasuartaammik sakkulik oqallinnermi peqataajartorsimasunut eqqaassilerpoq. Svenskip titartaasartup Lars Vilksip oqallinnermi peqataasup toqunneqarnissaa siunertaasimassagunartoq, politiit oqaatigaat. Lars Vilksip profeti Muuamaat qimmitut isikkulerlugu 2007-imi titartarpaa.
- Eqqaassisoqarnerani angut ataatsimeeqataasoq 55-inik ukiulik toqutaavoq politiillu pingasut ikiligaallutik.
- Eqqaassisutut ilimagineqartoq eqqaassereerlunilu folkevognimik polomik qimaavoq, biililu taanna pisup ungasinngisaani qimanneqarsimasoq nanineqarluni.
- Eqqaassiffiusumi misissueqqissaarneq aallartinneqarpoq eqqaassisorlu politiinit ujarneqalerluni.
- Nunatsinni nalunaaqutarput naapertorlugu arfininngornermi unnukkut qulingiluanut angutip angut 37-nik ukiulik Københavnip qiterpasissuani juutit naalagiartarfiata silataani nakkutilliisoq aallaallugu toquppaa. Politiit marluk aamma aallaaneqarput, inuunerminnilli ulorianartorsioratik.
- Københavnimiut illoqarfiup qiterpasissortaanukannginnissaat politiit kajumissaarutigaat.
- Nalunaaqutarput naapertorlugu unnuaq ataasinngortoq politiit Nørrebromi inissiamut, eqqaassisutut pasineqartup isersimaffigisaanut apuupput. Angut tigusariniarneqarnermini politiinut eqqaassilerpoq. Akillugu politiit eqqaassineranni eqqaassisutut pasineqartoq toqutaavoq.
- Nalunaaqutarput naapertorlugu unnuaq unnuap qeqqanut saassussinerit pillugit politiit tusagassiorfinnut paasissutissiipput. Saassussisoq qularnanngitsumik Parisimi peqqarniisaartoqarneranit isumassarsisitaasimagunarpoq. Tamatumunnga peqatigitillugu politiit misissueqqissaartartuisa oqaatigaat, saassussisoq politiinit ilisimaneqareersoq.
- Nunatsinni nalunaaqutarput naapertorlugu ullumi ataatsimut qiteqquttoq, politiit Nørrebrogademi internetertarfik isaaffigaat. Ikinnerpaamik inummik ataatsimik tigusarinnittoqartoq uppernarsarneqarpoq. Aviisip Ekstra Bladep allaaseraa tigusarineqartut sisamaasut.