Politiit kalerrisaarisuusaarnermut kamapput

Nalunaaqqutaq 16.15 Ilulissani Politiit, Aasiaat Radioatigoorlugu kalerrinneqarput, ajunaalernermi kalerrisaarisoqartoq.  Kalerrisaarinerlu, Diskop avannaata tungaaneersuuvoq, tassa Saqqap nalaaniit.

Ilulissani Politiit pisortaat Karl Winther, ajunaalernermi kalerrisaarineq pinartutut isigineqartartoq, ima oqaatigaa. 

-Mayday-imik ajunaalernermi kalerrisaarisoqaraangat, ikiuutaasinnaasut tamaasa atorlugit ikiuuttarpugut. Mayday atorneqartarpoq, aatsaat inuup inuunerannik naleqalernerani.Taamak pinartigisumik pisoqaraangat, politiit annaasiniarnerit immakkut nunakkut silaannakkullu ingerlanneqalertartut, politiinit paasissutissiissuutigineqarpoq.  Politiit angallataat Sisak annaasiniarfissamut ingerlatinneqarpoq, inuinnaallu sumiiffiup eqqaaniisinnaasut aamma ikiortisigineqarput. Air Greenland saaffigaarput, qulimiguulimmik annaasiniaajartoqqullugit, taamaammat pisoq pinartutut isigineqarluni ikiuutaasinnaasut tamaasa atorlugit annaasiniaaneq aallartippoq, Karl Winther oqarpoq.

Annaasiniat Saqqap eqqaanut pigamik, paasivat silagissorsuusoq, imaq sumilluuniit maleqanngitsoq, ajutoortoqarsimaneranillu sumilluuniit pasinartoqarani. Taamaammat politiit pisumut pasitsaasaqarput.

-Maannamut pasitsaassarput tassaavoq, inuit piaaralutit sallullutit ajunaalernermi kalerrisaarisimasut. Tamanna pinartutut, suliassatullu tiguarpoq. Tamanna pissuteqarpoq, annaasiniarnerit annertuut aallartinneqarmata, nunatsinnilu najugaqartunut aamma ulorianartorsiortitsillutit. Tassa imannak, Kalaallit Nunaata kitaata arlaani ajunaalersoqartuuppat, ukullu sallullutik ajunaalertuusaartut orninneqarnerani, allat  annertuumik ulorianartorsiortinneqassapput. Taakku avataatigut, aamma annaasiniarneq taamak annertutigisoq, aningaasatigut annertuumik atuiffiusarpoq Karl Winther oqarpoq.  

Akileraartartut akiligaanik, aningaasat qanoq amerlatigisut annaasiniarnermut, atorneqarsimanissaat Karl Wintherimit oqaatigineqarsinnaanngilaq

-Aningaasat qassit atorneqarsimanissaat, massakkungaaq eqqoriarsinnaanngilara. Kisiat oqaatigisinnaavara, qulimiguuliinnarmilluuniit attartorneq akisoqaaq.

Taamaammat politiit oqariartuutaat ersarippoq.

-Sakkortuumik erseqqissaatigissavarput ajunaalivinnermi kalerrisaarineq Mayday asuli atugassiaanngimmat, Maydayimik kalerrisaarineq pinartutut isigineqartarpoq, pimoorullugu aamma tiguneqartarluni, Ilulissat Politiiviniit Karl Winther taama oqarpoq.