Politiit: Inuarsimasumut tigusarineqarsimanngitsumut annilaangassutissaqanngilasi
Nuummi politiit unnerluussisartuisa pisortaat Helle Olesen isumaqarpoq Nuummi pinerlussimasumik tigusarineqarsimanngitsumik inoqaraluartoq taamaattoq Nuuk inuuffigissallugu eqqissisimanartuusoq.
- Pissutissaqavillunga toqutsisimanermut pissutaasoq oqaatigisinnaanngilara, tamannami suli paasineqanngilaq. Taamaakkaluartoq politiinit isumaqarpugut Nuummiut annilaagassutissaqanngitsut, unnerluussisartut pisortaat Helle Olesen erseqqissaavoq.
Jens Peter Berthelsen Nuummi inissiat ilaanni toqugasoq februaarip 24-ani 2007-mi siumorneqarpoq.
Politiit toqutsisimanermut atatillugu paasiniagassat misissugassallu tamaasa misissorsimavaat, toqutsisimanermulli atatillugu uppernarsaataasinnaasumik suli paasisaqartoqanngilaq. Toqutsineq ukiut tallimat matuma siorna pisimagaluartoq – taamaattoq toqutsinermut suliaq unitsinneqanngilaq. Paasissutissanilli nutaanik takkuttoqarpat misissuinerit aallartinneqassapput.
- Ilisimatitsissutigissavara toqutsisimanermik misissuisoqartillugu misissuisinnaasut tamaasa sulisorniarneqartarmata, Helle Olensen oqarpoq.
Severine Serubabelsen politiit misissuinerannut apeqqusiivoq.
- Ataatagaana angerlarsimaffeqartuunngimmat, imerajuttuummat aalajangersimasumillu suliffeqanngimmat toqutaanera pillugu politiinit siulliullugu paasiniarneqarsimanngitsoq, Severine Serubabelsen KNR-mut sapaatip akunneri marluk matuma siorna oqarpoq.
Unnerluussisut pisortaat Helle Olesen erseqqissaavoq paasisinnaallugu ilaqutaasut misigissutsimikkut tamanna attorneqaatigisinnaagaat, isumaqarsinnaallutik misissuinermut atatillugu politiit tunulliussisut, misissuinermut atatillugu suli paasisaqartoqarsimanngimmat.
- Erseqqissaatigissavara Kalaallit Nunaanni politiit toqutsisimanermut atatillugu tamaviaarlutik misissuisarmata, apeqqusiinatik kina, sumi qanorlu toqutaasimanersoq, Helle Olesen oqarpoq.
Severine Serubabelsenillu paasisinnaannginnerarpaa politiit toqutsisimanermut atatillugu sooq unititsigallartariaqarsimanersut.
- Toqutsisimanermut atatillugu misissuinerit pisoqalinngisaannarput, paasissutissanik nutaanik takkuttoqartillugu misissuisimanerit uterfigineqaqqittuaannarsinnaallutik. Misissuinerilluunniit allat pissutissaqartitsilersinnaallutik toqutsisimanermut atatillugu annerusumik misissuilernissamut, Helle Olesen erseqqissaavoq.