Politiit ilisimannittunik ujaasipput
Angut suliamut tunngatillugu politiinut oqaaseqarusunngilaq, taamaattumik arnap nassuiaanera kisimi tunngavigineqartoq Ilulissani politiit oqaatigaat.
- Angut arnarlu arfininngornermi unnukkut illoqarfimmiissimasut nalunngilarput, taamaattumik marluutillugit takuneqarsimanersut paaserusupparput, unnuap ingerlanerani susoqarsimanersoq tamakkiisumik ilisimannginnatsigu, Søren Rønnov Ilulissani politiineersoq oqarpoq.
Angut 30-nik ukiulik inatsit tunngaviusoq naapertorlugu killisiorneqareerluni sapaatit akunnerini sisamani tigummigallagaasussanngorpoq.
Inuup sananeqaataanut ilisarnaatitut takussutissat Danmarkimi Retsmedicinsk Institutimut Ilulissani politiinit aamma nassiunneqarput.
- Kisianni misissuinerup inerneri qaammat ataaseq qaangiuppat aatsaat takkutissapput, taamaattumik sapaammi ullaassakkut imerniartarfiit matunerisa kingorna arnamik angummillu takunnissimasinnaasut politiinut saaffiginneqqullugit kaammattorusuppavut, Søren Rønnov oqarpoq.
Arnap 26-nik ukiullip angutillu 30-nik ukiullip kinaaneri politiit oqaatigerusunngilaat, kisianni imatut isikkoqarput:
Arnaq kalaaliuvoq, 165 cm-erinik angissusilik, tuattuunanilu suangasuunngitsoq, nujai qernertut naatsuupput illuatungaalu takinerulaarlutik, qernertunik atisaqarpoq.
Angut kalaaliuvoq, 180 cm-erinik angissusilik, tuattuunanilu suangasuunngilaq, naatsunik qernertunik nujaqarpoq.
Pineqartut pillugit ilisimannittut Ilulissani politiinut saaffiginnequneqarputm,, oqarasuaat 94 32 22.