Politiit ikorfartoqatigiiffissaminnik pilersitseqqullugit kaammattorneqarput
Politiit Posttraumatisk Stress-syndromimik nappaateqalersimasut, nammineq piumassutsimik ingerlanneqartumik ikorfartoqatigiissinneqartarput, taaguuteqartumik Politiets Kammeratstøtteordning. Taamatut ingerlatsisut Kalaallit Nunaanni assigusumik pilersitsisoqarnissaa kissaatigaat.
Politiit ulluinnarni sulinikkut atugaat oqimaannerulersimapput, Danmarkimilu politiit amerliartuinnartut sakkortuunik misigisaqartarneq pissutigalugu Posttraumatisk Stress-syndromimik nappaateqalertarput. Taamaattumik politiit peqatigiiffimmik namminneq piumassutsiminnik ingerlanneqartumik arlaannaanulluunniit attuumassuteqanngitsumik 2009-mi pilersitsipput, taallugu Politiets Kammeratstøtteordning – tassalu ilaatigut politiinut napparsimalersimanertik pissutigalgu soraarsitaasimasunut ikorfartoqatigiittarfiulluni.
Peer Withagen, naalagaaffiup politiivini siunnersorti, aamma ikiorfartoqatigiiffimmik ingerlatseqataasoq oqarpoq, Kalaallit Nunaanni assigusumik pilersitsisoqarnissaa tapersersornartoq:
- Politiets Kammeratstøtteordningimi ilaasortaapput politiit PTSD-mik nappaateqalersimanertik pissutigalugu soraarsitaasimasut. PTSD-mik nappaateqalersimasut attavigiuminaatsorujussuusarput matoqqasunngortaramik. Taamatut napparsimasut ilaqutaat aamma uagutsinnut ilaasortanngortarput, Peer Withagen oqarpoq.
Taassuma oqaatigaa Kalaallit Nunaanni politiit suliunnaarnikut Danmarkimi aaqqissuussinermut assigusumik ikiorfartoqatigiiffimmik pilersitsinissaat isumatusaarnerussasoq.
- Soorunami tapersersornassaaq Kalaallit Nunaanni politiit suliunnaarsimasut pilersitsissappata, Peer Withagen oqarpoq.
Danmarkimi Politiets Kammeratstøtteordning 60-it missaanni ilaasortaqarpoq – taakkunani ataaseq Kalaallit Nunaanneersuulluni.