Politiit Greenpeace unitsippaat
Nalunaaquttap akunneri 90-it missaliorlugit Greenpeacekkormiut uuliamik qillerivissuup ataani annanniarfiusinnaasumi simiusami issimareersut uuliamik qillerivissuarmi Leiv Eirikssonimi politiit akuliupput.
Pingasunngornermi unnukkut nalunaaqutaq qulit qaangerlugit tanneq pingasut, nunatsinni oqartussaasut akuliuttut Greenpeacekkormiut nalunaarutigaat tassalu angallatit sukkasuuliat marluk atorlugit Cairn Energyp qillerivissua, Leiv Eiriksson ornippaat.
- Sakkutuut angallatit sukkasuuliat marluk atorlugit ornippaatigut aamma qulitsinniit aqqarniartoqarpoq. Naluara qasseriarlunga nalunaarutiga manna nutarteqqissinnaanerlugu, Greenpeace sinnerlugu iliuuseqartartoq Hannah Twitter atorlugu nalunaaqutaq 22.25 allappoq.
Politikommissær Niels Nyvang Nuup politiivineersoq malillugu politiit akuliunnerat siusinnerusukkut aallartippoq tassalu nalunaaqutaq 21.30 iliuuseqartartut marluk Tuluit Nunaanneersoq aamma USAmeersoq tigusarineqarpoq.
- Imaassinnaavormi nalunaaqutaat uagut nalunaaqutaanniit allaannerusoq, Niels Nyvang pingasunngornermi unnukkut KNRimut oqarpoq.
Politiet nalunaarput tigusarinninneq eqqissisimasumik pisoq tigusarineqartullu unnerluunneqartut angerlarsimaffimmi eqqissimanissamik akornusiisimasutut kriminallovens aammalu sillimaniarnermut killeqarfiit pillugit Namminersorlutik Oqartussat aalajangersagaannik unioqqutitsisimasutut.
Tigusarineqartut marluk politiit Nuummut ingerlappat tassanilu isummerfigineqassaaq inatsisit tunngavigalugit killisiorneqassasut.
Niels Nyvang aamma oqarpoq annanniarfiusinnaasoq simiusaq Greenpeace-kkormiut qillerivissuup ataani atugaat arsaarinnissutigineqarluni Nuummukaanneqartoq.
Ilimanarpoq Cairn Energyp nunatta imartaani ukiormanna uuliasiorneranni Greenpeace qanoq iliuuseqaqqeriataarsinnaasoq suli.
Greenpeacep umiarsuani Esperanzamit Twitterikkut nalunaarut malillugu imatut tunngavilersuisoqarpoq:
- Manna iliuuseqarniarnitsinnik unitsitsinngilaq issittumi uuliasiornerit ernumanartullit unitsinniaratsigit.
Greenpeacep umiarsua alla Arctic Sunrise, ullut kingulliit immap assingani takussaasimanngitsoq Cairn Energys qilleraluni umiarsuata Ocean Rig Corcovadop eqqannguaniittoq paasinarsivoq.
