Politiit: Amerlasuuni innaallagiaqaleqqippoq, innaallagiarli qameqqissinnaavoq

Nuummi juullimi naneruuterpassuit ikititerneqarsimapput. Illoqarfiillu pingaarnersaat nalunaaquttap akunnerini 18-ini innaallagiaqanngereersoq immikkoortut arlallit qaammaqqereerput.

Ataasiakkaalli angerlarsimaffii suli taarsinnaapput. Taakkualu politiit maanna ukkatarinerpaagaat, politimester Bjørn Tegner Bay oqaluttuarpoq.

- Innuttaasut innaallagiaqannginnamik kiassarneqaratillu imeqanngitsut isumakuluutiginerpaavagut. Akunnattoornermut suli pinngilagut, tamaanngali pisinnaaneq pilersaarusiornermi tunngavigaarput, taanna oqarpoq.

Inuit iniminnik kissatsitsineq ajulersut imermillu amigaatillit kommunimut saaffiginnissinnaapput. Oqarasuaatit iluatsillugit sianersinnaagaanni, kommuni oqarasuaammi normukkut 367281-kkut attavigineqarsinnaavoq. 

Aammali takkutiinnarnissaq periarfissaavoq.

- Politiit qatserisartulluunniit biiliisa illoqarfimmi ingerlaartut unitsinnissaat periarfissat pingajoraat, Bjørn Tegner Bay oqarpoq.

Politimestilli ajornanngippat nammineernissaq kaammattuutigaa. Taava oqartussat pisariaqartitsinerusut ikiorsinnaavaat.

Imeq innaallagiaq kiassarnerlu sipaarsigit

Innaallagiaq, Nuummi qullernut atortorissaarutinullu allanut atugaq, ajornartoornermi innaallagissiorfimmeersuusoq, politiit ilisimatitsipput.

Tamaammat Nukissiorfiit politiillu Nuuk innaallagiaaruteqqissinnaassasoraat. Pissutsillu suli nalinginnaalinngimmata oqartussat imermik, innaallagissamik kiassarnermillu sipaarnissamik kaammattuipput.

Taamaammat atortut innaallagiartortut atunngitsut qamitassaapput taavalu imeq kiassarnerlu pisariaqartinnerpaasaq kisiat atorlugit.

Politiit oqartussallu allat upalungaarsimasutut suliinnarallassapput.

Nukissiorfiit innaallagissap aqqutaa, innaallagiaaruttoornersuarmut pissutaasoq, iluarsaappaat. Innaallagissap aqqutaa Nuup taavalu Utoqqarmiut Kangerluarsunnguanni innaallagissiorfiup akornanni kittorsarsimavoq. 

Politiit qatserisartullu biilii Nuummi, Nuussuarmi Qinngorpumilu ingerlaaginnarallassapput.

Tusassip sulisui aamma oqarasuaatit angallattakkat, oqarasuaatit internettilu attavinnitsinniarlugit suli sulipput. 

Tusassimi tusagassinermi pisortaq, Julie Rademacher, ima oqarpoq: 

- Attavileeqqinniarluta tamaviaarpugut, imaassinnaavorli nuna tamakkerlugu attaviliiniarnerput sivisulaartoq. Inuiaqatigiinnut pingaarutillit salliutippagut.