Politiinngorniarfimmut qinnuteqartorpassuit
Politiinngorniarfimmi ilinnialernissamut qinnuteqartut pisarnertut angutaanerupput. Qinnuteqartut 78 %-ii angutaapput, arnallu qinnuteqartut 22 %-iinnaallutik. Qinnuteqartut amerlanerpaartaat kalaallisut oqaaseqartuupput, qinnuteqaatillu 86 %-ii Kalaallit Nunaanni najugaqartuneersuullutik.
-Qinnuteqaatit tigusagut kingulliit suli kisinngilagut, qinnuteqartulli amerlassusaat naatsorsuutigisagut pissarsiaraagut. Angutinut arnanullu agguataarneri aamma naatsorsuutigisatsitut isikkoqarput. Ingerlariaqqinnginnitsinni qinnuteqaatit misissorluaqqaassavagut, Politiinngorniarfimmi Nuummittumi pisortaq Frederik Lundblad knr.gl-imut oqaluttuarpoq.
Frederik Lundbladip kissaatigisaatut ingerlassappat, qinnuteqartut piukkunnarnerpaat aqqaneq marluk Politiinngorniarfimmi ilinniarnissamik neqeroorfigineqassapput. Tamannali pitinnagu politiitut sulilernissamik neriuuteqarlutik qinnuteqartut misilitsinnerit naliliinerillu arlariit aqqusaaqqaartussaassavaat.
-Qinnuteqartut naliliiffigineqaqqaassapput, pineqaatissinneqarsimanermullu nalunaarsuiffimmiikkunik, uatsinni sulilersinnaanissartik naatsorsuutigisinnaassanngilaat. Qinnuteqartut tallimanngorpat allattariarsornikkut misilitsissapput. Misilitsinneq taanna sinerissami tamarmi ingerlanneqassaaq, qinnuteqartut angerlarsimaffimminnut qanittumi misilitsissinnaaniassammata. Misilitsinnermilu tassani ingerlalluassagunik, timersornikkut misilitsinnerit juullinnginnerani ingerlatissavaat, Frederik Lundblad nassuiaavoq.
Allattariarsornikkut timersornikkullu misilitsinnerni angusisut amerlassusaat assigiinneq-ajorput, taakkunanili angusisimagaanni Kalaallit Nunaanni politiini sulilernissamik neriuuteqarluni juullimi sulinngiffeqartoqarsinnaavoq. Misilitsinneq kingulleq sapaatip akunnerani 3-mi ingerlanneqassaaq.
-Qinnuteqartut politiinngorniartussatut Rigspolitiinut inassutigineqannginnerini aamma oqaloqatigineqaqqaassapput. Atorfinitsitsisarnermut ataatsimiititaliap qinnuteqartut allattariarsornikkut timersornikkullu misilitsinerni angusisimasut oqaloqatigissavai. Oqaloqatigiinneq ingerlalluarpat qinnuteqartut qaammatini 36-ini ilinniarnissartik Kalaallit Nunaannilu politiini sulilernissartik qulakkiissavaat, Frederik Lundblad oqarpoq.
