Politiinit ujaarineqalertinnani apuuppoq
Angut sapaammi unnukkut aqqarnup eqqaani piniariarluni aallarsimavoq, aqaguani ullakkut arfineq pingasut missaanni utissanerarluni.
Angutilli tikiffissamisut nalunaarutigisimasani eqqorlugu tikinngitsoormat, ilaqutaasa ullukkut ujariartorlugu aallarput. Nassaarinnginnamikku ualigaa politiinut maqaasineqartutut nalunaarutigaat.
Unnukkut qulingiluat missaanni politiit ujaasiartornialeruttortut angut ajornani tikippoq.
Paasinarsivoq angut umiatsiami motoorianik unittoorsimagaluarnini pissutigalugu kingusinaarluni utertoq.
- Angut aallarami oqarasuaatini angallattagaq nassatatuarisimavaa. Taqussersimanngilaq, radiumik ajunaalernermilu kalerrisaarutaasinnaasunik nassataqarsimanngilaq. Taamaammat ajornani tikinnera iluatsitsinerujussuuvoq, Qasigiannguit politeeqarfiani ulluinnarni aqutsisoq, Taitsiaq Heilmann KNR-imut oqarpoq, erseqqissarpaalu aallartinnani sillimmateqarnissaq pingaaruteqarluinnartuusoq.
