Politiinik salloqittaasoq paasineqarpoq

Sallulluni nalunaaarutiginnittoq tassaavoq nukappiaraq 14-inik ukiulik, taanna politiit aamma Tele Greenlandip suleqatigiinnerisigut ullut marluk ingerlaneranni paasineqarpoq.

Nukappiaqqap ullup ataatsip ingerlanerani pingasoriarluni sallulluni nalunaarutiginnissimanini politiinut ingerlaannaq nassuerutigaa.

Nalunaarutiginninneq siulleq novembarip aallaqqaataani ullup qeqqata missaani takkuppoq. Illoqarfimmi atuarfiit ilaanni aallaasersortoqarneranik politiit tassani ilisimatinneqarput.

Nalunaaquttap akunnerata affaa qaangiuttoq nalunaarutip aappaa takkuppoq, tassani mittarfimmi aallaasersortoqarnera oqaatigineqarpoq. Kisianni sallulluni nalunaarutiginninnini nukappiaqqap oqaloqatigiinnerup ingerlanerani nassuerutigaa.

Ualip ingerlanerani ambulancit politeeqarfimmut takkupput, arnamik naamigut aallaatissimasumik aallertut.

- Nalinginnaasumik suliaq taama ittoq eqqartuussummik pineqaatissiinngikkallartumik kinguneqartarpoq qaavatigullu mikigisassaanngitsumik akiligassiisoqartarluni. Kisianni suliami uani nukappiaraq 15-init inorlugit ukiulik pineqarpoq, taamaattumik taarsiinissamut apeqqut inatsisiliortunut maanna misissortipparput, aamma nukappiaqqap angajoqqaamini najugaqannginnera nalilersuinermi ilaatinneqarmat, Julie Senderovitz politiit paasiniaanermut immikkortortaqarfianneersoq oqarpoq.

Susassaaleqineq politiinillu nuanniigisaqarneq peqqutaasut nukappiaraq politiinut nassuiaasimavoq.