Ilulissani iisartakkanik ulorianartunik ingerlaartitsoqarsinnaanera politiit mianersoqqussutigigaat
Ilulissani napparsimmaviup sisamanngornerup unnuaani tillinniarfigineqarneranut atatillugu iisartakkanik ulorianartunik tillinneqarsimasunik ingerlaartitsisoqarsinnaanera politiit ernumassutigaat.
Iisartakkat eqqunngitsumik atoraanni inuunermut ulorianaateqarsinnaasut, politiit ilisimatitsissutigaat.
Tillinniartoqarnera politiinit paasiniaaffigineqarpoq, innuttaasullu mianersoqquneqarput tillinniartoqarneranullu atassuteqarsinnaasumik pasitsannartunik tusagaqassagunik takusaqassagunilluunniit politiinut saaffiginneqquneqarlutik.
Ilulissani politiit oqarasuaatikkut 701422-kkut sianerfigineqarsinnaapput.
Politiit aamma tillinniartoqarneranut allamut takunnissimasinnaasunik ujarlerput. Ilulissani Panasonic Centerimut kalaalimineerniarfimmullu sisamanngornerup unnuaani tillinniartoqarneranut atatillugu takunnissimasinnaasunik, tusagaqarsimasinnaasunik imaluunniit paasissutissaateqarsinnaasunik politiit ujarlerput.
Taamaammat Panasonic Centerip, kalaalimineerniarfiup napparsimmaviullu eqqaanni sisamanngornerup unnuaani nalunaaqutaq 00:00-ip 06:30-llu akornanni pasinarsinnaasunik takunnissimasunik imaluunniit tillinniartoqarneranut atatillugu paasissutissaateqarsinnaasunik politiit ujarlerput.
Tamatumunngalu peqatigitillugu politiit innuttaasunut mianersoqqusipput, nioqqutinillu pisiniarfinnit akikinnerusunik imaluunniit pisinermut uppernarsaateqarfiunngitsunik innuttaasut piseqqunagit.
