Politiit 480 millioner koruuninik annertunerusumik ukiumut tunineqartassasut isumaqatigiissutip kinguneraa. Tassa katillugit 2 milliarder koruunit missaanni 2019-ip tungaanut aningaasalersorneqassapput.
Ilutigalugulu politiinngorniarfimmi aallartittartut amerlissapput, taamaalillunilu politiit 300-t missaannik amerlisinnaassallutik. Tamassuma kingorna isumaqatigiittut ilinnialerlutik aallartittartut amerlisinneqassanersut, taamaalillunilu politiit amerlillugit, 2017-imi isumaqatigiinniaqqissapput.
Aamma atuaruk Politeeqarnermut isumaqatigiinniarsimaneq Inuit Ataqatigiit ajuusaarnartoqartippaa
Politiit amerlinerisigut peqqarniisaarnianut akuiniarneq killeqarfinnilu pinerlunneq politiinit aallunneqarnerulissaaq.
Dansk Folkeparti De Konservativellu politiit amerlinissaannik kissaateqarsimapput. Dansk Folkepartiip ukiuni qulini politiit 2000-nik amerlinissaat eqqartortarsimavaat, De Konservativellu politiit 1500-nik amerlerusukkaat.
Aamma atuaruk Danskit politeeqarneq pillugu isumaqatigiissutaanni Nunarput peqataatinneqanngitsoq
Politiit 300-nik amerlinerisa saniatigut isumaqatigiittut isumaqatigiipput politiit 700-t suliaat, politiiunngitsunit suliarineqarsinnaasut, sulisunit allanit tiguneqassasut, taamaalilluni politiit allanik suliaqassallutik.
Maanna isumaqatigiissut naapertorlugu, politiinngorniarfimmi aallartittartut ukiut sisamat isumaqatigiissutigineqartut ingerlaneranni marloriaammik amerlissapput. Ukiuni sisamani kingullerni politiinngorniartut 900-t missaanniissimapput. Isumaqatigiissutillu kingorna ukiuni sisamani aggersuni 1800-nut amerlinissaat ilimanarsivoq.
/ritzau/