Danskit politeeqarneq pillugu isumaqatigiissutaanni Nunarput peqataatinneqanngitsoq
Socialdemokraatit Venstrelu taama, isumaqatigiissutip isumaqatigiissutigineqannginnerani nalunaaruteqarput.
Folketingimut ilaasortat Atlantikup avannaaneersut politeeqarneq pillugu isumaqatigiissusiornissamut qaaqquneqarsimanngillat. Politiit ukiuni aggersuni qanoq aningaasaliiffineqartigissanersut aammalu pinerlunnerit suut politiit pingaarnerutillugit suliniuteqarfigissaneraat isumaqatigiinniarnerni pingaarnertut oqaluuserineqarput.
Socialdemokraatilli naapertorlugit isumaqatigiissuteqarnissami naalagaaffimmi sumi inissisimaneq immikkut isiginiarneqassanngilaq.
- Politiit sumiiffinni pinerluttuleriffiusuni pisariaqartitaminnik atugassaqartinnissaat pineqaannarpoq, Socialdemokraatit eqqartuussiveqarneq pillugu oqaaseqartartuat Trine Bramsen KNR-imut taama oqarpoq, ilanngullugulu oqaatigaa isumaqatigiissuteqarnissami Danmarkimi kommunit assigiinngitsut aamma immikkut isiginiarneqassanngitsut.
Naalagaaffeqatigiinni sumiiffinni assigiinngitsuni sulisut qassiussanersut Naalagaaffiup politiivisa pingaarnersiuinermikkut aalajangissavaat.
Folketingimut ilaasortat nunatsinneersut Nunatsinni politiinut aningaasaliissutaasartut amerlineqarnissaannik kissaateqarsimapput, ilaatigut kommunefogeditut atorfinnik amerlanerusunik pilersitsinissaq siunertaralugu. Tamannali isumaqatigiissuteqarnissami ilaatinneqassanngitsoq oqaatigineqarpoq.
Isumaqatigiissuteqarnissami ilaatigut peqqarniisaarniarnerup akiorniarneqarnissaanut, killeqarfinnik nakkutilliinerunissamut Danmarkimilu najugaqarfinni inooqataaniarnikkut ajornartorsiorfiusuni suliaqarnerup annertusarneqarnissaanut immikkut aningaasaliisoqarnissaa naatsorsuutigineqarpoq.
