Politeeqarfiit pitsanngorsaavigineqalersut
Nunatsinni Politiinut sulinermi atugassarititaasut ukiuni aggersuni pitsanngorsarneqartussanngorput, Nunatsinnimi politeeqarfiit iluarsartuunneqartussanngormata.
Politeeqarneq pillugu isumaqatigiissut Folketingimi amerlanerussuteqartunit novembarip qaammataani isumaqatigiissutigineqartoq, Naalagaaffeqatigiinnilu nunap immikkoortuini politeeqarfinnut tamanut tunngassuteqartoq pillugu Nunatsinni Politiit Naalagaaffiullu politiivisa ataatsimiinnerisa kingorna tamanna paasinarsivoq.
- Illuutitta ilarpassui iluarsartuunneqartariaqarput, ukiorpassuarni aserfallakkiartorsimammata. Tamakkulu aaqqiivigineqartariaqarnerannik Naalagaaffiup politiivi isumaqatigiissuteqarfigereerpakka, Nunatsinni politimesteri, Bjørn Bay, KNR-imut taama oqarpoq.
20 mio. koruunit nalinginut iluarsagassaqartoq
Naalagaaffiup politiivineersut illuutit misissoriartorlugit Nunatsinniissimapput, taakkulu naliliinerat naapertorlugu 20 millionit koruunit missaasa nalinginut iluarsartuutassaqarpoq.
Nunatsinni Politiit peqatigiiffianni siulittaasoq Finn Jeppesen, Naalagaaffiup politiivinik ataatsimeeqateqarsimasoq naapertorlugu, politiinut Nuup avataaniittunut aamma nutaarluinnarnik atugassaqartitsisoqalernissaa ilimanaateqarpoq.
- Kalaallit Nunaanni illoqarfiit anginerit ilaata - sorliunersoq oqaatigissanngilara - illuutinik anginerusunik pitsaanerusunillu ukiuni arlalinni amigaateqarfiusimavoq. Politiillu suliaminnik paarsilluarnissaminnut illumik pitsaanerusumik atugassaqartinneqalernissaat neriuuteqarfigaara.
Politiit biilinik Toyotanik atuiinnarsinnaassapput
Politiit biiliinut tunngatillugu aamma nutarterisoqassaaq.
Naalagaaffiup politiivi biilinik tunisassiorfimmut allamut isumaqatigiissusiorsimagaluartut Nunatsinni politiit neriorsorneqarput politiit biiliinik Toyotanik, Nunatsinni angallatigissallugit tulluarnerusunik pisiortuinnarsinnaassasut, Finn Jeppesen taama ilisimatitsivoq.
- Politiit biilinik tunisassiorfiit aalajangersimasut isumaqatigiissuteqarfigaat, taakkulu Nunatsinni ukiorpassuarni atorsimasatta tulluartinnerutitattalu assiginngilaat. Kisianni Nunatsinni atorusutavut atuinnarsinnaassallugit neriorsorneqarpugut, tamannalu soorunami iluarisimaaqaarput.
Naalagaaffiup politiivi biilinik tunisassiorfimmut allamut isumaqatigiissusiorsimagaluartut Nunatsinni politiit neriorsorneqarput politiit biiliinik Toyotanik, Nunatsinni angallatigissallugit tulluarnerusunik pisiortuinnarsinnaassasut, Finn Jeppesen taama ilisimatitsivoq.
