Politeeq tigusarineqartoq
Taannalu Maniitsup eqqartuussiviani matoqqasumik killisiorneqassaaq, ikiaroornartut pillugit inatsimmik unioqqutitsisimasutut pasisaalluni. Taama ilisimatitsivoq vicepolitimester Morten Nielsen, Sermitsiaq.ag-mut.
Killisiuinermi pasineqartoq politiit paasiniaanerisa nalaanni sapaatit akunnerini sisamani tigummigallagassanngortinneqarpoq.
- Suliaq paasiniagarput nuanninngilluinnarpoq, soorlu inatsisinik unioqqutitsinerit suugaluartulluunniit paasiniartakkavut taamaattut. Uagut pineqartilluta assigiinngissitsineqartanngilaq, Morten Nielsen oqarpoq.
Killisiuineq pivoq januarip aqqarnanni. Nuummi Politimestereqarfimmi sulisut politiit angallataanik Maniitsuliarput, pasineqartorlu tigusarineqarpoq killisiorneqarlunilu. Tigusarineqarsimasoq Nuuliaanneqassaaq.
Morten Nielsenip erseqqissaatigaa Maniitsumi politeeqarfimmi sulisut allat pasineqanngitsut.
