Polar Seafood ukiuni arlaqartuni angusaqarluarnerpaasoq
Polar Seafood ukiut pingajussaa aningaasaqarnikkut siuariartuinnavippoq, 2015-imiillu angusaqarluarnerpaalluni. Tamanna 2018-imi ukiumoortumik naatsorsuutini takuneqarsinnaavoq.
Akileraaruteqareerluni angusat 38,5 millioner koruuninik qaffariaateqarput, katillugit 155,4 millioner koruuninik sinneqartooruteqarluni.
2017-imi akileraaruteqannginnermi angusat 257,1 millioner koruuniniit 307,2 millioner koruuninut qaffariaateqarput.
Nikeriarnerlu naammaginartuusoq, aqutsisut nalunaarumminni naliliipput.
Tamannalu siulersuisuni siulittaasup Henrik Lethip imannak itisilerpaa.
- Angusat, Polar Seafoodip oqaluttuarisaanerani pitsaanerpaanut ilaasut, naatsorsuutigisanit annertunerupput, saniatigummi umiarsuarnut nutaanut annertuunik aningaasaliisimavugut minnerunngitsumillu nunatsinni aalisakkerivitsinnik pitsanngorsaasimalluta, taanna oqarpoq.
Kaaviiaartitat ikileriartut
Ukiumoortumilli naatsorsuutini siumukarnerinnaq saqqummiunneqanngilaq.
Polar Sefoodip kaaviaartitai 40 mio. koruuninik appariaateqarput, katillugit 3,28 mia. koruuninngorlutik.
Henrik Lethip aamma ilisimatitsissutigaa, aktiaatilinnut ukioq manna iluanaarutinik agguaasoqassanngitsoq, aqutsisut aalajangersimagaat.
Tamassumunnga peqqutaavoq, Polar Seafoodip aningaasaqarnikkut sillimmateqarluarnissaata pingaaruteqartutut nalilerneqarnera.
- Naluneqanngitsutut pisuussutit uumassusillit aallaavigalugit ingerlatsisuuvugut, taamaattunilu peqassutsit pisassallu nikittarneri akunnattoorfigisinnaallugit ingerlatsilluta. Aammalu akunnattoorfigineqarsinnaasut allat ilagivaat nunarsuarmi tuniniaaviusut, ingammik ukiuni makkunani, naatsorsuutigiuminaassinnaasarnerat. Soorlu assersuutigalugu taasinnaavara Brexit (Tuluit Nunaata EU-mit isumaqatigiissuteqqaqqaarani anisinnaanera). Tamatumami takutippaa qanoq pingaartigisoq, nunarsuarmi tuniniaanitta iluani tunisassiatsinnik tunisiffiusinnaasunik nutaanik ujartuiuarnissarput, siulittaasoq oqarpoq
AAMMA ATUARUK Royal Greenland 126 millionit koruuninik sinneqartooruteqarpoq
Polar Seafoodip namminneq aningaasaataani aamma takuneqarsinnaavoq 1,067 milliarder koruuninik qaffariaateqartut. 2017-imi nammineq aningaasaatai 929,3 millioner koruuniupput.
Aqutsisut nalunaarutaanni allassimavoq, ukioq manna siornartulli angusaqarnissaq naatsorsuutigineqartoq.
- 2019-imi ukiumi angusat 2018-imut sanilliullugit allanngunnginnissaat naatsorsuutigineqarpoq, sulialli annertussusaat 2018-imut sanilliullugit 5 aamma 10 procentit akornanni annikilleriarnissaat naatsorsuutigineqartoq, aqutsisut allapput.
