Polar Seafood: EU-p Nunarput akornusersorpaa
- Raajat akiitsuusernagit tunisisinnaanerup ikilinissaanut EU iluamik pissutissaqanngilaq. Kalaallit Nunaannut akornusersuiniarsarisut uanga isumaqarpunga. EU-mullu suleqatigiinniarneq uani takujuminaatsippara, Henrik Leth oqarpoq.
Raajanut pisassiissutit ukioq kingulleq ikilineqarneri pissutigalugit, Polar Seafood suliffissuaatitik ingerlatiinnarniarlugit USA-mit Canadamiillu raajanik pisisariaqartalersimasut, raajallu EU-mut akiitsuusernagit siorna nioqqutigisinnaasimagaluaraat, Henrik Lethip oqaatigaa.
Taamaasisinnaajunnaarpulli.
Tassami EU-mut raajat akiitsuuserneqanngitsumik nioqqutigineqarsinnaasut siorna 2100 tonsiugaluartut 500 tonsinut EU-mit ikilisinneqarput.
- EU-mut niuerniarutta nioqqutissat ineriikkanut akit 20 procentit qaavatigut akiliisariaqassagatta nioqqutissanik eqqussuinerput ikilisittariaqassavarput. Taamaasinikkullu sulisugut ataavartumik suliassaqartiinnarnissannut saperngulissaagut, unammillersinnaanerpullu aamma sunnernerlunneqassaaq, Henrik Leth oqarpoq.
Akiitsuusersuinermi inatsisit allanngortinneqassagaluarunik Polar Seafood 5000 tonsit 6000 tonsillu akornanni USA-mit Canadamiillu eqqussisinnaassagaluartut, taamaasinikkullu Polar Seafoodip Nuummi Aasiaannilu suliffissuaani sulisut 100-ut ataavartumik sulisinneqarsinnaagaluartut, Henrik Lethip oqaatigaa.
Namminersorlutik Oqartussat inatsisit allanngortinnissaannut sulissuteqaraluarput. Allannguisinnaaneralli Henrik Lethip qularivaa.
EU-lu piniarnerup aalisarnerullu iluani inatsisinik allannguisarnera Nunatsinnut ajoqutaasoq, Polar Seafoodip siulersuisuini siulittaasoq isumaqarpoq.
- Oqaaseq akornusersuiniartut naluara atussanerlugu. Kisianni puisit amii pillugit aamma avaleraasartuut pillugit aporfissalersuiniarnerat takoreerparput. Raajat akiitsuuserneqanngitsut tunisassiarisinnaaneranut maannakkut aporfissalersuinialerput, Henrik Leth oqarpoq.
