Plutoniumik mingutsitsisoqarsoraat
1968-imi timmisartorsuup B-52-ip nakkarneranit eqqaamasat nuanniitsut amerikamiullu sermersuup ataani suliffigisimasaat Camp Century” atomimik ingerlatilik, inughuit akornanni peqqinnissaq pillugu oqallinnermi puttallaqqajaapput.
Qaanaami eqqaanilu innuttaasut malugaat innuttaasut nappaalaqqajaanerulersut. Tamakku amerikamiut sakkortooqarfiannit mingutsitsinermit pisuussasut innuttaasut pasitsaappaat. Eqqaaneqartut tassaapput timmisartorsuup 1968-mi nakkarnera aammalu sermersuup ataani suliaqarfiusimasoq ”Camp Century”. Aamma radareqarfiusimasut Dye one aamma Dye two mingutitsiffiusimasut pasitsaanneqarpoq.
- Radareqarfiit isaariaat qaartitsinikkut matuneqarnerannut pissutaasoq pillugu ataataga oqaluttuunneqarsimavoq, inniuliutaannut tunngasut maskiinat ulorianartorujussuummata, taama Qanoruumut oqaluttuarpoq piniartoq Uusaqqak Qujaukitsoq.
- Taamaammat avanersuarmiut ernumassutigaat timmisartorsuup nakkarnera ,kisimi pissutaanngitsoq, taama oqarpoq.
Ilumulli amerikamiut mingutsitsinerannik pissuteqartumik innuttaasut nappaalanersut uppernarsaruminaatsoq, ilisimatooq Peter Bjerregaard oqarpoq, taanna innuttaasut peqqissusaannik misissuinermik ingerlatseqataavoq.
Taanna maanna avanersuarmiut peqqissusaannik misissuivoq.
- Innuttaasut peqqiilliornerannut suna pissutaanersoq aatsaat ilisimatuussutsikkut uppernarsineqarsinnaavoq inuppassuit misissornerisigut. Avanersuarmili innuttaasut ikippallaarput tunngavigissallugit peqqiilliornermut suup pissutaaneranik nalunaaruteqarnsisamut, taama oqarpoq Peter Bjerregaard.
Piniartukkormiut maanna pisortanut piumasaraat mingutsitsinermut aallaaviusinnaasut nalunaarsorneqassasut aammalu sumiiffinni suni sakkortuut suliaqartarsimanersut.
