"Plus minus nul" naggataamik Nuummi unnugu takutinneqassaaq
Isiginnaagassiamik ilitsersuisuuvoq, Schweizimiu isiginnaagassiortartoq Christoph Marthaler, arlalissuarnik nersornaatisisimasoq.
Eqqumiitsuliortup Julie Edel Hardenbergip isiginnaagassiaq "Plus minus nul" isiginnaagassiatut eqqumiitsutut sakkortuumillu qamuuna takorluuilersitsisutut oqiliallannartutullu taavaa. Filmiliortartullu Mikisoq Hove Lyngep isiginnaagassiaq misigisatut angisuutut, nunanut tamalaanut nallersuussinnaasutut, isiginnaartitsisunillu quliusunit pitsaasunik angusaqarfiusutut taavaa.
Isiginnaagassiami isiginnaartitsisarfimmit Unlimited Performing Arts-imit suliarineqartumi, ilaatigut suleqatigineqarput, Københavnimiittoq Det Kongelige Teater aamma Stockholms Stadsteater. Ilaatigut aningaasatigut tapersiisoralugit Kulturkontakt Nord, Nordiske Kulturfond, Air Greenland, Royal Arctic Line aamma Namminersorlutik Oqartussat.
Isiginnaagassiaq marlunngormat takuteqqaarneqarpoq, Katuami Inersuaq Hans Lyngemi unnugu kingullermik takutinneqassalluni.