Playstation 3-t teknikkikkut ajornartorsiuteqarput
PlayStation 3-t qanganisaanerit, ataasinngormat nunarsuaq tamakkerlugu teknikkikkut ajornartorsiuteqalerput. Pinnguaatiliortoq Sony, isumaqarpoq pinnguaatit nalunaaqutartaat ajutoornernut pissutaasut.
Allattoq Apollo Jeremiassen
marsip 02-at 2010 04:23
Nunarsuarmiut allat assigalugit PlayStationip pinnguarinissaa Nunatsinni nuannarineqaqaaq. Pinnguaammilli peqartut ilaat ajornartorsiuteqarsimapput.
Sonyp siunnersuutigaa pinnguaatit ajoqutaasa iluarsineqarnissaasa tungaanut pinnguaatit pinnguareqqunagit. Taamaattorli oqaatigaat PlayStation 3 qanganisaanerusut taamaallaat ajornartorsiuteqarmata, pinnguaatilli nutaat PS3 "slim"-inik taaneqartartut ajoquteqanngitsut oqaatigineqarpoq.
Suliffeqarfissuup Sonyp oqaaseqartartuata oqaatigaa, PlayStation 3-p internettekkut attaveqarniarnera imaluunniit attaveqartinnagu atornissaa ajornarsimasoq.
Ullup ingerlanerani ajornartorsiut aaqqinneqarumaartoq Sonyp neriuutigaa.
