Platini nunatsinnukalerpoq
Nuup arsaaffia aasamut tusamaasarsuarnik tikeraarfigineqalerpoq. Tamakku ilagaat FIFAp præsidentia Michel Platini aamma Laurent Blanc. Angutit taakku imaannaanngitsumik arsaattartutut oqaluttuassartallit ilaasortaapput Variétés Club de France-mut.
Københavnimi franskit aallartitaqarfiat aqqutigalugu saaffiginnittoqarpoq Variétés Club de France kissaateqartoq Nuup arsaaffiani julip qulingat arsaakkumasoq. Taannalu peqatigiiffik imaannaanngilaq tassanimi ilaasortat ilagaat Michel Platini, Laurent Blanc aamma tennissertartoq Jannick Noah.
- Parisimiit Nuummut angalasussat aqqi suli nalunaarutigineqanngillat, Kalaallit Nunaanni arsaattartut kattuffianni GBU-mi siulittaasoq Lars Lundblad taama nalunaarpoq.
Variétés Club de France nalunaarsimavoq angalanermi peqataasussat 30-it missaannittut taakulugooq namminneq angalaneq najugaqarnerlu akilerniarpaat.
GBU ukiormanna ukiunik 40-nngortorsiorpoq tamannalu malunnartinniarlugu FIFA Football Festival ingerlanneqarniarpoq Ilulissani, Nuummi Qaqortumilu arsaannermut tunngasunik sammisaqartoqassalluni aammalu sungiusaasunik pikkorissaasoqassalluni.
Nalliuttorsiorneq aamma malunnartinniarlugu GMip naggataarnerani peqataasut amerlineqarput. Angutini inersimasuni annguttussat quliussapput, arnani annguttut arfineq pingasuussallutik. Angutit inuusuttut GM-rnerannut annguttut arfineq pingasuussappat arnallu inuusuttut GM-lerpata peqataasut sisamaassapput.
