Plakatinik saqqummersitsineq ammarpoq

Katersugaasiviup ittuata Peder Stougaardip plakatit amerlanersaat nunanit assigiinngitsunit katersugarai, katillugillu 400-t katersorsimasami affai saqqummersillugit. ammineq Kalaallit Nunaanniinnikuunngisaannaraluarluni ukiuni arlalinni Kalaallit Nunaat pillugu saqqummersitsinissaq eqqarsaatigisimavaa.

- Nunap inui, oqaluttuarisaanerat aqqusaarnikuusaallu alutoreqaakka. Aamma isumaqarpunga kalaallit inuiaqatigiinnit qallunaanit tamatigut iluartuinnarmik pineqartarsimanngitsut, taanna KNR-imut oqarpoq.

Saqqummersitanik isiginnaartut Peder Stougaardip tiguartittarsimanerarpai.

Plakatit saqqumersineqartut 250-it amerlanersaat katersugaasivimmit pigineqarput. Katersugaasivilli qaammatini kingullerni plakatinik Kalaallit Nunaannut attuumassuteqartunik piniarnikuummat aamma katersugaatigilikkanik nutaanik ilaqarput. Plakatit nipilersukkanut, isiginnaartitsinermut, politikkimut, pinngortitamut, kiinarpannut kiisalu tupilannut tunngasut immikkoortiternikuupput.

Peder Stougaard nammineq kusaginerpaasaminik toqqaarusunngilaq, qanoq kusarnartiginerat apeqqutaanngilaq qanorli qanoq oqaluttuassartaqarnerat pingaarneruvoq.

- Naqitat assigiinngitsorpassuit plakatitut taaneqartarput. Kusanartumik naqitaasinnaapput assilipalaagaasinnaallutilluunniit, Peder Stougaard taamatut oqarluni qallunaap autakkiortup Dan Turéllip oqalugiarnissaanut ussassaarut, Kalaallit Nunaata oqaluttuarisaaneranut ilanngutassamininnguaq takutippaa.

Plakatinik katersugaasivik Århusimi Den Gamle Bymi Friluftsmuseumimut atasuuvoq.

Plakatit Kalaallit Nunaannut tunngasut aggustip 7-ata tunganut saqqummersinneqassapput.