Piviusunngortinniarnera ajornakusoortarpoq
Sanaartukkat annertuut sanaartugassanillu sulinermi siunissamilu aatsitassarsiornissami uuliasiornissamilu nunaqavissut sulisorinissaannik piumasaqaateqarneq oqallisigineqartuaannarpoq. Piumasaqaatigineqartoq pissusissamisoortutut oqaatigineqarsinnaagaluarluni piviusunngortinniarnera ajornakusoorsinnaasarpoq.
Taamatut innera Ilulissani sanaartortitsinermit assersuutissaqarpoq.
Ilulissat eqqaanni erngup nukinganik nukissiorfissamik sanaartornermi annertuumi kalaallit sulisorineqarnerat oqaluttuarissavarput.
Islandimiut suliffeqarfiutaat Istak erngup nukinganik nukissiorfimmik sanaartorluni siorna aallartippoq. Suliffeqarfik taanna danskit sanaartornermik suliffeqarfiutaanit Phil & Sønimit piginneqataaffigineqarpoq.
Sanaartornermik isumaqatigiissusiornermi kalaallinik sulisoqarnissaq nunaqavissullu kiffartuussinissaannik Nukissiorfik Istakilu isumaqatigiissuteqarput.
Isumaqatigiissutip oqaasertai ilisimanngikkaluarlutigit, sapinngisamik nunaqavissut sulisorineqarnissaat nunaqavissullu pilersuinissaat siunertaavoq. Tamanna malinneqaqqissaarnersoq qulakkeerlugu paasinarsinngilaq.
Sanaartornermi sulisut siorna 80-it missaannik amerlassuseqarput, taakkunannga nunaqavissut taamaallaat quliullutik.
Nunaqavissut sulisorineqartut assigiinngitsunik suliaqarput. Umiarsuarmi inuttat arfiniliiupput, sinnerisa suliaat tassaallutik biilinik aquttoq ataaseq, mekanikereq ataaseq, maskinisteq svejserisorlu ataaseq.
Nunavissut sulerisuunerannik paasisagut tusarfinnit assigiingitsuneersuupput.
Nunaqavissut sulisorineqarnerat sanaartortunit aammalu sanaartortitsisumit Nukissiorfimmit nipituuliuutigineqanngillat.
Nunaqavissut qulit sulisorineqarnerat amerlanersut ikinnersulluunniit eqqarsaatersuutigineqarsinnaavoq.
Ilulissat eqqaani erngup nukissiorfiliornermi aasarmanna nunaqavissut qulit sulisorineqassasut naatsorsuutigineqarpoq.
Istakip Ilulissat eqqaani erngup nukissiorfissamik sanaartornermi pisortap Gisli Gumundssonip qassinik sulisoqarneq pillugu paasissutissanik tunniussisarnera ingasagisassaanngilaq. Taanna e-mail-ikkut nassitsilluni nalunaarpoq, erngup nukissiorfimmik sanaartornermi maannakkut 50it missaanniittut sulisorineqartut, aasallu ingerlanerani amerlanerusut suliartortussaasut. Sanaatorfimmi pisortaq e-mail-ikkut allakkamini ima allappoq issuaaneq aallartippoq " kalaallinik arlaqartunik sulisoqarpugut taakkualu amerlanersaat uagutsinnut nammineerlutik qinnuteqarput" issuaaneq naavoq.
Ukiormanna sulisut akornanni, nunaqavissut qulinik amerlassuseqarnissaat ilimagineqarsinnaavoq, umiarsuarmi inuttat tallimat arfinillilluunniit sulinissaat ilimagineqarpoq, sanaartorfimmi sulisut pingasut, sulinermillu misiliisut pingasut sulinissaat naatsorsuutigineqarluni.
Tassalu sanaartornermi sulisut tamarmik kalaaliunissaat ungasikkallarpoq.