Piviusulersaarutip aqqusinermi inuuneq takutissavaa

Filmiliortoq ilitsersuisorlu Ditte Haarløv Johnsen oqaloqatigaarput. Taanna aallaqqaammut nalornissuteqarsimavoq.

- Aallarteqqaarama eqqarsaatigisimavara kalaallit pillugit filmiliorniarnanga Kalaallit Nunaat pillugu ilisimasaqannginnama. Nammineerlunga Afrikami peroriartorpunga, annilaanngatigisimavaralu kalaallit ajuallatsissanasoralugit aammalu uanga maluginngisannik nunasiaatilittut pissusilersortutut isigineqassanasoralunga. Qallunaaq kalaallit angerlarsimaffeqanngitsut pillugit oqassappat uannut eqqarsarnartoqarsimaqaaq, Ditte Haarløv Johnsen oqarpoq.

Ditte Haarløv Johnsenip erseqqissarpaa filmimi malinnaaffigineqartut ataqqeqatigiissumik suleqatigineqarsimammata.

- Inuit uannut misigissutsikkut eqquisut uannullu tatiginninnermik angisuumik tunniussaqartut filmiliarisarpakka. Inuit filmimi pineqartut inuunermik ajornartorsiuteqarfioqisup filmiliarineqarnissaat inerneralu akueraat. Soorunami kissaatiginanngilluinnaraluarpoq taamatut inuuneq tamanut takusassiarissallugu, kisiannili akuerineqarpunga taamaaliussasunga, Ditte Haarløv Johnsen.

Ditte Haarløv Johnsenip neriuutigaa filmi kalaallinik ajornartorsiortunik sullissinermut pitsaasumik sunniuteqarumaartoq.

- Inuit filmi qanoq isummerfigissaneraat aqussinnaanngilara. Neriuutigiinnarpara kalaallit ajornartorsiortut, Danmarkimi Kalaallillu Nunaanni isigineqarnerannut, allannguijumaartoq, Ditte Haarløv Johsen oqarpoq.

Filmi piviusulersaarut “Hjemløs” Kalaallit Illuanni Københavnimi pingasunngorpat takutinneqassaaq oqallisigineqassallunilu.