Piviusulersaarut Nuka Eskimo Diva sinerissami angallanneqartoq

Inuit sisamat angalaqataapput, angalaqataasullu Kalaallit Nunaannut aammalu filmiliornermut soqutiginnilluartuupput.

Angalaqataasut tassaapput filminut piviusulersaarutinut filmiliortartoq Henrik Ipsen, filmimik ilitsersuisoq Lene Stæhr, filmiliortartoq Pipaluk K. Jørgensen filmimilu Nuka Eskimo Divami pingaarnertut inuttaasoq 23-inik ukiulik Nuka Bisgaard.

- Angalaqataavunga pissutigalugu filmi inuusuttunut oqariartuuteqarmat. Taakkualu taamaattumik filmiliorusulerninnut aammalu sooq akuersisimaninnut isumassartititsisuupput. Tassami Kalaallit Nunaanni inuusuttunut tuniussaqarsinnaangaatsiarmat. Pingaaruteqarluinnarpormi saperani sassarsinnaanissaq aammalu kinaassutsimik takutitsisinnaanissaq, Nuka Bisgaard KNR-imut taama oqarpoq.

Taanna maannakkorpiaq Ilulissaniippoq filmilu Ilulissani siullermeerluni unnugu takutinneqassaaq.

Filmi takutinneqareerpat Nuka Bisgaard arnatut atisalersorluni takutitsisoq isiginnaarneqarsinnaassaaq takutitsereerpallu isiginnaariat oqallinnermut peqataasinnaapput, tassanilu eqqartorneqassalluni illoqarfinni mikinerusuni allaanerussuteqartuuneq. Tamatumalu oqaluuserineqarnissaa imikkuullarissuseqarpoq:

- Nammineerlunga ilungersunartut aqqusaartarnikuuakka. Sassarsinnaanissarmi kisiartaanngilaq. Imminulli qiviarnissaq aammalu kinaassuserisap paasinissaa pingaaruteqarpoq. Neriuppungalu inuit allat taamaattassasut, inuusuttuugaluarunik inersimasuugaluarunilluunniit, Nuka Bisgaard oqaluttuarpoq.

Angalanerli filmimik takutsitsinissamik oqallitsitsinissamillu siunertaqaannanngilaq, aamma allat filmiliornikkut piginnaasaminnik takutitsinissaminnut isummarsiortinnissaannik siunertaqarpoq.

Filmiliullaqqissutsip naniuk

Taamaammat filmip takutinneqannginnerani  periarfissaavoq piviusulersaarutinik filmiliortartup Henrik Ipsenip saqqummiinera tusarnaassallugu. Taanna ukiut 20-t sinnerlugit nunarsuaq tamakkerlugu angalaffigisimavaa filmiliarisimasaasalu ilagaat imaani ujajaasut sorsuttullu.

Inuusuttut ullup ingerlanerani periarfissinneqarput filmiliorneq pillugu sammisaqartitsinermut peqataassallutik. Ilaatigut filmiliaritissinnaassappiuy piviusulersaarusiornermillu misilittagallit sulinerat tipisiuiffigissallugu.

- Piviusulersaarummik ilitsersuisuusoq oqaluttuassatsialammik Nuka Bisgaard aqqutigalugu nassaarsimavoq, oqariartuullu oqaluttuami qanoq oqaluttuarisinnaanerlugu isumaqarpunga pingaartuusoq. Tassanimi suut tamarmik aallartiffeqarput. Oqaluttuaateqaruit qanoq ilillutik filminngornissaanut ineriartortitsisinnaavit. Tamannarpiarlu pissutigalugu taamatut sammisassaqartitsivugut, film.gl-imeersoq Pipaluk K. Jørgensen, angalanermi sammisassaqartitrsinermi ikiortaasoq taama oqaluttuarpoq.

DJ-ip Aqqalu Engellip, aamma DJ Uyarakqtut ilisarisimaneqartup tusarnaartitsineranik ulloq naggaserneqassaaq.

Ilulissat saniatigut, filmi Uummannap katersortarfiani arfininngorpat sapaatiuppallu takutinneqassaaq, marlunngorpallu Qasigiannguit timersortarfiani takutinneqassalluni, tallimanngorpallu tulliani Sisimiuni kultoorikkut illorsuarmi Taseralimmi takutinneqassalluni.