Piukkunnartut siumukarput
Sulorartartut Sara Lindskov Jakobsen, Hedvig Broberg, Taatsi Pedersen aamma Jens Frederik Nielsen Danmarkimut sungiusariaqqammerput unamminermik naggaserneqartumik. Inuusuttut takutinniartussaavaat siunissamut nunanut allanut unammisartuulernissamut piukkunnassusertik.
- Assut takulluarnarsimapput oqaatigisinnaavaralu inuusuttut suli siuariartortut, taama KNRimut oqarpoq nuna tamakkerlugu sungiusaasoq Bjarne Nielsen.
Sara Lindskov Nuummi B-67-mi unammisartoq Herlevimi unamminermi U-17-ni semifinalemut anngukkaluarpoq tassungali killiinnartariaqarluni. Aamma Hedvig Broberg Qeqertarsuarmi QSP-mi unammisartoq unamminerni aallarniutaasuni ajorsarpoq.
Jens Frederik Nielsen aamma Taatsi Pedersen Nuummi B-67-meersut inersimasut unammineranni C-række-mi semifinalemut anngukkaluarput tassanili ajorsartinneqarlutik. Aamma angutit ataasiakkaarneranni peqataapput tassani Jens Frederik Nielsen kvartfinalemi ajorsarluni. Ajorsarfia Carsten Hansen Ledøje Smørumimeersoq unammersuarnermi ajugaasuuvoq. Taatsi Pedersen ottendedelsfinalemi ajorsarpoq.
- Unammisartut Kalaallit Nunaanneersut Danmarkimiinnertik pissarsiffilluarpaat unammigamikkit imminerminnit sungiusarnerusarlutillu unammikulaarnerusut. Taamaammat naammagisimaarnarput semifinale angusinnaasimammassuk, taama Bjarne Nielsen oqarpoq.
- Taamaasillutik takuaat unammersuarnerni taktik qanoq atorneqartigisartoq. Siunertaraarput suli sungiusarnerunissamut kaammattornissaat aammalu unammeriaatsinut ilisimasaqarnerulernissaat, taama Bjarne Nielsen oqarpoq.
Taanna porskimi Nuummut tikissamaarpoq nunatsinni pissartanngorniunneq malinnaaffigiartorlugu. Unammersuarnerit naammassippata Island Gamesimut peqataasussat toqqarneqassapput tassanilu qulit toqqarneqartussaapput.
