Inuussutissarsiutit

Pituffiup aalajangiiffigineqarnera suliffeqarfiup allap aamma suliassanngorteqqippaa

Amerikamiut eqqartuussiviata Pituffimmi kiffartuussinissamik isumaqatigiissut pilllugu eqqartuussutaata inernerata ilaa Copenhagen Arctic A/S-ip suliassanngorteqqippaa. Tamannalu pivoq naak ingerlaatseqatigiiffiup amerikamiut sakkutooqarfiata aalajangernera pillugu suliassanngortitseqqinnermini naammagittaalliuuteqarnermini isumaqatigineqaraluartoq.
Allattoq Helle Nørrelund Sørensen
aggustip 04-at 2015 07:56
Nutserisoq Simon Uldum -

Amerikami eqqartuussiviup Federal Court of Claimsip Pituffimmi kiffartuussinissamik isumaqatigiissut pillugu maajip qaammataani eqqartuussutaata inernera ingerlatseqatigiiffiup Copenhagen Arctic A/S-ip suliassanngorteqqippaa.

Ingerlatseqatigiiffimmi pisortaaneq Jeppe Handwerk KNR-imut taama ilisimatitsivoq.

Copenhagen Arctic A/S amerikamiut sakkutooqarfiata aalangiinera pillugu suliassanngortitseqataagaluarpoq isumaqatigineqarlunilu.

Jeppe Handwerkili naapertorlugu ingerlatseqatigiiffiup naammagittaalliuutigisaata isummerfigineqarnissaa suli amigaataavoq.

- Suliffeqarfiit ingerlatsisunut sullissisut danskiunissaat pillugu apeqqut eqqartuussisumit isummerfigineqarsorinngilarput. Tamannalu eqqartuussutip inernerani amigaataalluinnartutut isigaarput, Jeppe Handwerk taama oqarpoq.

AAMMA ATUARUK Aarsleff: Kiffartuussinissamik isumaqatigiissut uagutsinnut tunniunneqartariaqarpoq

AAMMA ATUARUK Pituffimmi kiffartuussinissamik isumaqatigiissut US Air Forcep sivitsorusukkaa

 

Suliffeqarfiit ingerlatsisunut sullissisut danskiusariaqarnerat

Copenhagen Arctic A/S, suliffeqarfiup paasissutissaatai naapertorlugit suliffeqarfinnik ingerlatsisunut sullissisunik Danmarkimiinnaq nalunaarsorneqarsimasunik atuisuuvoq. Suliffeqarfinnilli ingerlatsisunut sullissisunik atuinissamut malittarisassat erseqqissarneqarnissaat "pilersaarusiornermut tunngatillugu" pingaaruteqartut, pisortaaneq ilisimatitsivoq.

- Isumaqarpugut suleqatigiit pilersitavut eqqarsaatigalugit suliariumannittussarsiuussinermut tunngatillugu erseqqissaatigineqartariaqartoq suliffeqarfinnik ingerlatsisunut sullissisunik nunanit allaneersunit atuissagaanni tamanna nassuiaateqarfigineqartariaqassasoq. Tamatumanimi nukittuupilussuarmik inissisimavugut, tamannalu eqqartuussisumit aamma uppernarsartikkusupparput.

Unammillertimili ilaata suliffeqarfinnik ingerlatsisunut sullissisunik nunanit allaneersunik atuinersut oqaaseqarfigerusunngilaa.

Aammaattaaq ingerlatseqatigiiffiup Exelis Service A/S-ip amerikamiut eqqartuussiviata eqqartuussutaata inernera Pituffimmi kiffartuussinissamik isumaqatigiissummik annaasaqarnerminik kinguneqartoq suliassanngorteqqippaa. 

Suliassanngortitseqqiineq qaammatit pingasut arfinillillu qaangiuppata inerneqassangatinneqarpoq.

Tamatumalu pinissaata tungaanut amerikamiut sakkutooqarfiat, Pituffimmik ingerlatsisuusoq, Greenland Contractors I/S-imut kiffartuussinissamik isumaqatigiissutini sivitsorniarlugu aalangersimavoq.

AAMMA ATUARUK Exelis Service suliassanngortitseqqiivoq

AAMMA ATUARUK Utaqqiisaasumik isumaqatigiissuteqarnissaq GC-p nuannaarutigaa

 

 

 

Aamma atuaruk