Utaqqiisaasumik isumaqatigiissuteqarnissaq GC-p nuannaarutigaa
USA-p Greenland Contractorsimut kiffartuussinissamik isumaqatigiissutiminik sivitsuerusunnera sapaatit-akunnerata siuliani tusarliunneqarpoq. Isumaqatigiissummi taanna amerikamiut suliffeqarfiutaata aningaasaqanngitsup Exelis Servicesip suliassamik tunineqannginnissaanik eqqartuussiviit ilaata naqissusiinerata kingorna nalornissutaalerpoq.
Isumaqatigiissullu nutaaq sivikinnerpaamik ukiup affaani atuutissasoq Greenland Contractorsimi pisortaq Peter Kofoed finans.dk-mut taama ilisimatitsivoq.
- Aallaqqaasiutitut qaammatinik arfinilinnik sivitsorneqassaaq qaammatinik arlalinnik ilaqqinneqarsinnaassalluni. Isumaqatigiissut nutaarluinnaassaaq, aamma maajip qaammataani eqqartuussut arlalinnit suliassanngorteqqinniarneqarnera pissutigalugu, Peter Kofoed taama oqaluttuarpoq.
AAMMA ATUARUK Pituffimmi kiffartuussinissamik isumaqatigiissut US Air Forcep sivitsorusukkaa
Isumaqatigiissutip qanorpiaq ilusiligaanera aammalu Greenland Contractorsimut aningaasatigut qanoq iluanaarutaatigissanersoq pisortap itisilerusunngilaa.
Suliffeqarfiulli sakkutooqarfimmiiginnarallarsinnaanera tupaallannanngitsumik nuannaarutigaa.
- Iluarisimaarpara. Aamma qanoq ilinikkulluunniit isumaqannginnatta Exelis suliassamik tigusiumaartoq. Suliariumannittussarsiuusseqqittoqassagunarpoq, tamatumanilu neqerooruteqaqqinniarluta isumaliorpugut, Peter Kofoed finans.dk-mut taama oqarpoq.
AAMMA ATUARUK USA-p aallartitaa: Isumaqatigiissummik tamanut tulluartumik peqalissaaq
AAMMA ATUARUK Exelis suliassanngortitseqqilersoq
Nittartagaq naapertorlugu suliffeqarfiup ukiut 40-t sinnerlugit suliassamik ingerlatsisimasup kiffartuussinissamik isumaqatigiissuteqarfigeqqinneqarnissaa pisortap maanna isumalluarfigilerpaa.
Greenland Contractors sanaartugassanik suliffeqarfimmit MT Højgaardimit 67 procentinik pigineqarpoq 33 procentii Namminersorlutik Oqartussanit pigineqarlutik.