Inuussutissarsiutit Ilinniarneq

Pituffimmi kiffartuussilertussat kalaallinik ilinniartuuteqarsinnaarusupput

Danskit suliffeqarfiutaata Exelis Servicesip, Pituffimmi sakkutooqarfimmi sullissinissamik US Air Force-imik isumaqatigiissuteqarsimanini, maanna nalunaarutigaa, 411 millionit dollarinik, imaluunniit 2,4 milliardit koruunit missaannik nalilimmik isumaqatigiissusiorsimalluni. Nutaarsiassaqartitsivik Ritzau taama allaaserisaqarpoq.

Allattoq Jonas Løvschall-Wedel, Mads Lynge

novembarip 10-at 2014 16:25

Isumaqatigiissutip septembarip 2022-mut atuutsinneqarnissaa ilimagineqarpoq, Pituffiup ulluinnarni ingerlanneqarneranut atussalluni.

Exelis Services Ritzau naapertorlugu Danmarkimi nalunaarsorneqarsimavoq, Danmarkimilu angerlarsimaffeqartutut nalunaarsorneqarsimalluni.

Aamma atuaruk Greenland Contractors Pituffimmi sullissiunnaassaaq

Amerikamiut Greenland Contractorsimik suleqateqarunnaarlutik, Vectrusimik, Exelis Servicesip ataani inissisimasumik suleqalerneranut atatillugu pisuutitsiniarnerit imaaginnavissimapput.

Danmarkimi suliffeqarfiit nalunaarsorneqarsimaffianni CVR takuneqarsinnaavoq Exelis Servicesip siulersuisuini ilaasortat tamarmik Colorado Springsimi najugaqartut, soorlu aamma pisortaat tassani najugaqartoq.

Aamma atuaruk Pituffimmi GC-mi sulisut soraarsitaanissartik ernummatigissanngilaat

Suliffeqarfik siorna apriilip ulluisa 23-anni pilersinneqarsimavoq.

Sulisulli ilinniarluarsimallutillu piginnaaneqarluartut sulisoriinnarneqarnissaat, kalaallillu sulisinnaanissaat attanniaritsik, siulersuisut siulittaasuata Matt Kleinip erseqqissaatiginikuuaa.

- Thule Air Base-mi suliassanut tunngatillugu nalunngilarput ilinniartitaanermi pingaarutilittut aamma inissisimajumaartugut, kalaallit ilinniartuutigineqarsinnaanissaat aamma siunniullutigu. Suliffiit unammillerluarsinnaasut tamaani najugalinnut neqeroorutiginiarpavut, Matt Kleinip oqaatigaa.

Aamma atuaruk Pituffimmi kiffartuussinissamik isumaqatigiissutip annaaneqarnera politikerit ernumanartoqartikkaat

Kalaallit Pituffimmi sulisorineqarsinnaanissannut Namminersorlutik Oqartussat piumasaqaataat ilisimallugit, taassuma oqaatigaa, kalaallillu ilinniartuutigineqarsinnaanissaat ammaffigalugu.