Assi: Simon Uldum

PITUFFIK Pituffik pillugu isumaqatigiissutip annaaneqarnera Olsvigip misissuiffigeqqugaa

Pituffimmi sakkutooqarfimmi kiffartuussinissamik isumaqatigiissutip amerikamiunut qanoq ilillugu annaaneqarsimaneranik misissuisussanik arlaannaannulluunniit attuumanngitsunik Naalakkersuisut pilersitsinissaat Inuit Ataqatigiit siulittaasuata Sara Olsvigip kissaatigaa.

Siunissami assingisaanik pisoqaqqinnginnissaa anguniarlugu misissuisoqarnissaa kissaatigalugu Sara Olsvig allappoq imalu apeqquteqarluni:
 
- Naalakkersuisut pineqartoq misissuiffigerusunngikkunikku, taava sutigut qangalu ajutoortoqarsimanera qulaajarumallugu Naalakkersuisut qanoq iliuuseqarniarpat?

AAMMA ATUARUK KNR-ip allagaatinik takunnikkumanera danskit ministereqarfiata akiumaataaraa

Inatsisiliornermi aammalu amerikamiut danskillu isumaqatigiissutaanni amigaataajunnartut aaqqiivigineqarsinnaanissaat Sara Olsvigip neriuutigaa, Nunarput siunissami tamatumunnga tunngatillugu nukittunerusumik inissisimanissaa anguniarlugu. Aammattaaq avissaartuutsitsinissamik siunertaqarani naqissuserpaa.
 
- Piumasaqaat tassaatinneqassanngilaq maanna Naalakkersuisunik siuliinilluunniit uparuaaneq, kisiannili tassaasoq aaqqissuussinermi aamma Danmarkimut USA-mullu isumaqatigiissutini sanngiiffiorpasissut Kalaallit Nunaannit aaqqinneqarnissaat qularnaarumallugu piumasaqaatigisarput,
Olsvig taama allappoq.

AAMMA ATUARUK Pituffiup aalajangiiffigineqartarnera Folketingip danskinut utertikkusukkaa



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl