Pituffiup aalajangiiffigineqartarnera Folketingip danskinut utertikkusukkaa
Inuit Ataqatigiit nunatsinni Naalakkersuisut suliami qanoq akuusimatiginerannik arlaannaanulluunniit pituttorsimanngitsumik misissuisoqarnissaanik piumasaqaateqarnertik aalajangiusimavaat, Folketingimilu partiit tamakkerlugit aammalu danskit nunanut allanut tunngasunut ministeriaqarfiat suleqatigalugit aalajangiiffigisassatut siunnersuummik suliaqarsimalluni, tassanilu amerikamiut Kalaallit Nunaanni sakkutooqarfeqarnerannit Nunatta sapinngisamik annertunerpaamik pissarsiaqarnissaa - ilinniartoqarnikkut, suliffissatigut aammalu akileraarutitigut isertitatigut - danskit naalakkersuisuisa sulissuteqarnissaat kaammattuutigineqarpoq. Pingajuattullu, piumasaqaatit tunngavissallu pillugit siunissami nalornisoortoqaqqinnginnissaa danskit naalakkersuisuinit qulakkeerneqassasoq aamma piumasarineqarpoq.
Dansk Folkeparti namminerisaminik aalajangiiffisassatut siunnersuuteqarniarpoq, USA-mut isumaqatigiissutip isumaqatigiinniutigeqqinneqarnissaanik danskit naalakkersuisui kaammattorneqarlutik, Pituffimmi kiffartuussinissamik isumaqatigiissummut suliffeqarfiit neqerooruteqarniartut danskit nunanut allanut tunngasunut ministeriaqarfiannit, nunatsinni naalakkersuisut pisarnertut qanittumik suleqatigalugit, akuerineqaqqittalernissaat aammalu Kalaallit Nunaata amerikamiut Pituffimmi sakkutooqarfeqarnerannit sapinngisamik annertunerpaamik pissarsiaqaannarnissaat qulakkeerniarlugu.
