Pituffik pillugu isumaqatigiissut atorunnaarallartinneqassanngilaq
Isumaqatigiissutilli piffissami sivikinnerusumi atuutsinneqarnissaa pillugu USA-p Danmark Kalaallit Nunaatalu akornanni taarsiullugu isumaqatigiinniutigineqaleruttorpoq. Isumaqatigiissut ukiuni arfineq-marlunni atuuttussaajunnaarsillugu taamaallaat ukiumi ataatsimi atuutilersinneqarsinnaanissaa isumaqatigiinniutigineqartoq, Danmarkip nunanut allanut tunngasunut ministeriata Martin Lidegaardip Folketingimi matoqqasumik isumasioqatigiittoqareernerup kingorna oqaatigaa.
AAMMA ATUARUK Pituffik pillugu isumaqatigiinniarnerit suli ingerlanneqartut
Atorfilittat Nunatsinneersut Danmarkimeersullu Washingtonimi sapaatip-akunnerata siulianili Pituffimmik kiffartuussinissamik isumaqatigiissut pillugu isumaqatigiinniarsimapput.
Exelis Services A/S-ip kiffartuussinissamik isumaqatigiissusiorfigineqarnera illersornissamik Danmarkip Kalaallit Nunaat sinnerlugu USA-mik isumaqatigiissuteqarneranik unioqqutitsisuunerarlugu kiffartuussinissamik isumaqatigiissutip atorunnaarallartinneqarnissaa piumasarineqarpoq.
Piumasaqaalli taanna tassa piviusunngortinneqanngitsoorpoq, maannali isumaqatigiissutigineqarsimasup taarsiullugu sivikinnerusumik atuutsilersinneqarnissaa sulissutigineqarpoq, suliariumannittussarsiuussinissarlu nutaaq aamma sulissutigineqarluni.
Aamma atuaruk Nunanut allanut tunngasunut ministereqarfik atorfilittanik Pentagoniliartitsisoq
Suleqatigiissitaliat marluk pilersinneqarsimasut Martin Lidegaardip aamma nalunaarutigaa. Suleqatigiissitaliat taakku marluk suliassaat tassaapput suliariumannittussarsiuussinissaq, Kalaallit Nunaatalu aningaasaliinikkut ikiorneqarsinnaanissaanut tunngasut.
USA-milli isumaqatigiinniarnerit suli naammassineqanngimmata nunanut allanut tunngasunut ministeri annerusumik suli oqaaseqarumanngilaq.
