Pituffik pillugu isumaqatigiinniarnerit suli ingerlanneqartut
Danskit nunanut allanut tunngasunut ministereqarfianni Namminersorlutillu Oqartussani nunanut allanut tunngasunut pisortaqarfimmi atorfilittat qullersaasut, Pituffimmi sakkutooqarfimmi kiffartuussinissamik isumaqatigiissutigineqartoq isumaqatigiinniutigeqqinniarlugu USA-mut pingasunngormat aallartinneqarput. Suliffeqarfiup Exelis Servicep suliariumannittussarsiuussinermi ajugaanerata atortinneqaannarnissaanik USA-p aalajangernerata kingorna tamanna pivoq, naak danskit nunanut allanut tunngasunut ministeriat aalajangiineq unitsikkallaqqullugu USA-mut peqqusigaluartoq.
Aamma atuaruk Nunanut allanut tunngasunut ministereqarfik atorfilittanik Pentagoniliartitsisoq
Paasissutissat KNR-imit pissarsiarineqartut naapertorlugit, Pituffimmi sakkutooqarfiup atorneqarneranut sutigulluunniit akiliuteqarnissaq, soorlu assersuutigalugu atuinermut akiliuteqartarnissaq, USA-p itigartitsissutigaa. Inatsisartuni partiit amerlanersaasa tamanna siunnersuutigisimagaluarpaat. Paasissutissalli KNR-ip pissarsiarisimasai naapertorlugit USA-p Kalaallit Nunaanniinneranut USA-p allatigut niueqatigineqarnissaa oqaloqatigiissutigineqarpoq. Tamatumanilu ilaatigut Nunatsinni sanaartornermik suliniutinut aningaasalersuisoqarsinnaanera pineqartoq, KNR paasitinneqarpoq.
USA-p akiliuteqartalernissaq itigartippaa
Washingtonimili isumaqatigiinniarnerit sunik imaqarpiarnersut danskit nunanut allanut tunngasunut ministereqarfiannit oqaatigiumaneqanngilaq.
Folketingip Kalaallit Nunaannut tunngasunut ataatsimiititaaliaani ilaasortat nunanut allanut tunngasunut ministeri Martin Lidegaard matoqqasumik pingasunngorpat isumasioqatigissavaat. Ataatsimiinnermilu tassani Washingtonimi isumaqatigiinniarnerni angusat pillugit ilisimatitsisoqarnissaa naatsorsuutigineqarpoq.