Pitsaaliuinerup ullua Tasiilami iluatsilluarpoq
Ilaatigut attaveqaqatigiit ”Naapittartut”, imminut toquttarnermik pitsaaliuinermik suliaqartuusut kajumissaaserneqarput. Aammattaaq TB-mut tunngatillugu peqqissaasoq Jørgen Sommer tikeraartorineqarpoq, taassumalu Tunumi TB-mik tunillatsissimasorpassuit pillugit saqqummiivoq. Innuttaasummi amerlassusaannut naleqqiukkaanni nunarsuarmi rekordiliinertut taaneqartariaqarmat.
Aammattaaq kigutileriffimmit, meeqqanut ilaqutariinnullu sullissivimmit attaveqaqatigiinnillu, ilaatigut nakuusertarnermik pitsaaliuinermik suliaqartunit pulaartoqarpoq, peqataasullu pitsaaiuinerp ulluanut peqataanerminni sammisassanik toqqagassaqarluartinneqarput.
Timesornikkut nammineq kajumissutsiminnik suleqartut aamma peqataatitaqarput, aammattaaq Pinerluuteqarsimasunik Isumaginnittoqarfik najuuppoq, ilaatigullu Tunumi pinerluttaalisitsinermi suliniutit pillugit saqqummiisoqarluni. Kiisalu aamma atuarfiup tungaanit peqataasoqarpoq, atuartullu angajulliit imigassamik atuinerup kingunipilui pillugit sapaatit akunnerani immikkut sammisaqarneranni saqqummiisoqarluni.
Pitsaaliuinerup ulluanut peqataasut 250-it missaaniipput, aaqqissuisullu soqutigineqarnera iluarisimaartupilussuuaat.
