Pisuussutsit uumaatsut inuillu pisinnaatitaaffii pillugit ICC paasitsiniaanialerpoq
- ICC-mi sulerisarnersugut pillugit maani Kalaallit nunaanni innuttaasut paasititsiniaaffigerusuppagut. Taamak iliuuseqarnissarput piffissami sivitsulersumi piareersareerlugu ukiaq manna nunatta avannaatungaanut sassaalliunniarparput, upernaarulu nunatta kujataatungaa tullinnguutissallutigu. Tassa naatsumik oqaatigalugu: Innuttaasut oqaloqatigilerusuppavut, aaliangiussassallu pingaarutillit piffissami aggersumi  aaliangiunneqartussat innuttaasut akulerutsikkusullutigit, Hjalmar Dahl, ICC-p siulersuisuini ilaasortaq knr.gl-imut taama oqarpoq.
Kalaallit nunaanni pisuussutinik piaaffissanut, suliffeqarfissualiornissanulluunniit ICC-p akerliunnginnera tusarliutigissallugu pingaartinneqaqaaq. Tamakkuli ingerlanneqassappata paasissutissat pitsaasut tunuliaqutaasariaqarput, tamannalumi ullutsinni atuutsinneqannginnera ICC-p ima tikkuartuuppaa:
- London Mining-ip Nuup kangerluani suliffeqarfissaliassarsua pillugu Nuummiut paasititsiniaaffigineqarnissaannut periarfissagissaarsimavoq, nunalli sinnera puigorneqarsimalluni. Taakkumi pinngortitarsuarmik saviminissamik piaaffissaliorfissamik aamma atuisuupput, suliffeqarfissarsuullu maanna piniarfiusartut aalisarfiusartullu sunnertussaammagit innuttaasut taakkuninnga atuisuusut pitsaasumik paasititsiniaaffigineqartariaqarsorinarmata uagut suliassaq tiguarput, sineriammilu innuttaasunik ataatsimiititsisaqattaarnialerluta, Hjalmar Dahl, ICC sinnerlugu taama neriorsuivoq.
