Pisummik angalaniat Kujataani naleraliuunneqalerput
Pineqarput pinngortitami pisummik nammattagalerlutik angalaarnermik nuannarisallit - pingaartumik Kujataani angalaartartut sukkoortarnissaannik nalunaarsukkanik - nunap assiliuunnissaat.
Dansk Fjeldvandrerklub Danmarkimi qaqqasiortartut klubbiannik taasinnaasarput aamma peqatigiiffik Qatanngut suleqatigiissitanik marlunnik Kujataani qaammammi matumani nalunaarsuilissapput, sumiiffinni assigiinngitsuni pisummik angalaarfissanik, pingaartumik aallarterlaanut ingerlaarfissanik piukkunnartunik nalunaarsuissallutik.
Kujataani nammattagaliinnarluni pisummik angalaneq taamaalillugu aamma takornarianut ammaanneqarneruniarpoq.
Pinngortitami pisummik angalaartilluni sukkoornissaq inussuliornikkut aamma ujaqqat qaarsuillu qalipaammik aappalaartumik qalipanneqarnerisigut takusassiarineqassaaq, soorlu nunani allani taama pisartut, soorlu Norgemi qaqqat akornanni qooqqutigut pisuttuarniartut taama malitassaqartartut.
Nunatta Kujataani pisummik angalaniat sukkoornissaannik nalunaarsuineq kalaaleq pinngortitami angalanermik sungiusimasalik Christian Nielsen peqatigalugu suliarineqassapput.
Kommune Kujalleq suliassami aningaasaleeqataavoq.
Pinngortitami pisummik angalaarfissat siulliit aqagumiit nalunaarsorneqalissapput, ulluni 14-ini tulliuttuni suliarineqassallutik. Angalaarfissanik nalunaarsugassaq siulleq Narsarsuarmi mittarfeqarfiup eqqaaniippoq, Igalikumiit kujammut 50 kilometerisut isorartutigisoq.
Taanna naammasseriarpat juuli naalerpat Qassiarsummiit Narsamut aqqut aamma nalunaarsorneqassaaq. Nalunaarsuinerit naammassippata, aqqutaa piinnarnagu, aammali nunap assinga nalunaarsukkat sumiinnerinik nalunaaqutsersugaq quppersagaaranngorlugu, Kommune Kujalliup saqqummersikkumaaraa pilersaarusioqatigiit ilisimatitsissutigaat.
