Pissutsit piviusut allaanerunerarpai

- Sulisartut ukiorpassuarni Royal Greenlandimut attaveqataataat sinniisoqarfik Royal Greenlandimit taamaatinneqarsimavoq, taamaattumik soorlu aalisartunut attaveqartarnerit Keld Askærip ikkunerata kingornagut  pitsanngoriarsimanerannik oqartoqarnera paasiuminaatsippara, paasisavut tunngavigalugit taamaattoqanngimmat. Sulinermik Inuussutissarsiuteqartut Kattuffianni siulittaasoq Jess G. Berthelsen oqarpoq.

Jess G. Berthelsenip aamma erseqqissaatigaa, immikkoortortaqarfinnit tusartakkani tunngavigalugit pissutsit ajorseriarsimasut, soorlu sulisartunut ataqqinninneq millerujussuarsimasoq nalunaarutigineqartarmat.

- Aamma tusagassiutitigut tusartakkat tunngavigalugit pissutsit pitsanngoriartortutut nipeqanngillat, kingullertigullu namminersortunngorsaanissamut tunngasut pisortaanerup oqaaserisimasai Naalakkersuisunut ataqqinninnertut nalilersinnaanngilavut. Jess G. Berthelsen oqarpoq.

Aamma isumaqarpoq, namminersortunngorsaanissamut tunngasoq unitsikkallarneqartussatut Naalakkersuisunit naqissuserneqareermat oqaluuserineqarnera taamaatinneqartariaqaraluartoq.

- Avissaartuutsitseqqinnissaq anguniarlugu taama oqaaseqanngilanga, pissutsilli piviusut qanoq inneranik oqaaseqarnissara pisariaqartikkakku taama oqarpoq. SIK-p siulittaasua erseqqissaavoq.