Pissutsinik alaatsinaattut: Aleqa ataqinnippalunngitsoq nunatsinni avissaartuutsitsivoq
Marluullutillu Naalakkersuisut, pingaartumillu Naalakkersuisut siulittaasuat Aleqa Hammond, uparuarpaat, oqarlutik nunatsinni avissaartuutitsinermik pilersitsillunilu assigiinngitsutigut naleqqutinngitsunik oqaaseqartarsimasoq.
Chemnitzip Paulsenillu Sydafrikap siuttorisimasaa Nelson Mandela toqukkut qimaguteqqammersoq allaaseraat. Nunap siuttuata Aleqa Hammondip taanna tarrarsorfigisarlugu isumassarsiorfigisarlugulu arlaleriarluni oqaatigisimavaa. Taamatulli tarrarsortarnera allaaserinnittut ilisarisinnaanngilaat. Nunanut allanut tunngasut aamma sammisupilussuuaat.
Naalakkersuisut Filippinerini kiattup anorersuanik eqqugaasunut ikiuukkusussimannginnerat Jørgen Chemnitzip Weekendavisenimi allaaserisamini eqqumiiginerarpaa, ikiuiniarnermummi atugassanik nunatta karsiani 500.000 koruunit immikkoortinneqarsimagaluartut ikiuiniarnissaq aningaasassaqartinneqarsimanngilaq.
- Oqaluttuunneqanngilagulli aningaasat taakku sumut atorneqarsimanersut, Chemnitz allappoq nangillunilu:
- Aleqa Hammond nunani allani ajunaarnersuaqarfiusunut sunnguamilluunniit tunniusserusunngilaq, allamiulli toqusut iluaqutiginiarneqarsinnaappata atorsinnaakutsoorlugit. Tamannami Mandelap toquneranut atatillugu takuarput.
- Nunat tamarmik nunasiaataasimasut Nelson Mandelap saammaasseqatigiinnissamik angusaqarumanera aammalu inuiattut alloriarnissamut isummersornikkut pissarsilluarsimapput, nunap siuttua tusagassiorfinnut nalunaaruteqarluni taama allappoq. Aleqa Hammond Sydafrikami aqqusaarneqarsimasut assinginik atugaqarsimanitsinnik aatsaat oqaaseqalinngilaq. Saammaaseqatigiinnissamik ataatsimiititaliarsualiornissatsinnik eqqartuivoq, taassumami isaanit isigalugu nunasiaanerup nalaani suli inuuvugut. Sydafrikatulli atugaqarsimanitsinnik oqarnera, Mandelamut Danmarkillu nunasiaatimi kingullersaannik namminersulersitsiniarneranut kanngunarsaaneruvoq, Chemnitz oqarpoq.
Naja Paulsen AG-mi allaaserisamini aamma tupigusunnerarpoq.
- Oqanngilanga qinikkat tamarmik Nelson Mandelatut ittuussasut, neriuuteqalaaginnarpungali misiliinnarluguluunniit malinniarneqalaassasoq. Soorlu saammaasseqatigiinnissamik oqalunnermik ajunngitsussamik siunertaqartariaqarneq paasillugu, nammineq iluaqutissatut atorniaannarnagu kalaallit akornanni ajortussarsiornertut, Naja Paulsen oqarpoq.
Aammattaaq Aleqa Hammondip kajortumik miseqqiorneq Danmarkimit ilikkarsimasatuaralugu oqaaseqarnera uparuarpaa. Allaammi danskinit miseqqiullaqqinnerulluni oqaatigaa. Taamatullu oqaaseqarnera pissuserissaarnerunngitsoq, Paulsen isumaqarpoq.
Aleqa Hammondip taamatut oqaaseqarsimanera Chemnitzip aamma arajutsisimanngilaa.
- Miseraq kajortoq Nunatsinni iluaralugu pissarsiarisimasatta kisiartarinngilaat. Naalagaaffeqatigiit kujasinnerpaartaanit pissarsiarisimasagut ajunngilluinnartut marluk tikkuarusuppakka, tassalu iffiaq aamma tamat oqartussaaqataanerat, demokrati. Iffiaq Nunatsinni ingerlalluarpoq, tamat oqartussaaqataaneralli ingerlanerliorluni. Miseraq kajortoq Aleqa Hammondip isumaginiarliuk, namminermi oqarneratut miseqqiullaqqinneruvoq, Jørgen Chemnitz allappoq.
