Pissarsiarisagut naammagiinnartariaqarpagut

Jens B. inatsisinut ataatsimiititaliami ilaasortanngorpoq, Palle Christiansenilu kukkunersiuinermut ataatsimiititaliami ilaasortanngorluni. Annertugisassaanngikkaluartut Demokraatit qinersinermi ajorsarujussuarnerisa kingorna naatsorsuutigisinnaasaannit annertuneruvoq. Ataatsimiititaliani ilaasortaaffiit d’Hondt-ip periaasia malillugu agguaanneqartarput, taannalu maleqqissaarsimagaanni Demokraatit ataatsimiititaliani ataasinnguamilluunniit ilaasortaatitaqassanngikkaluarput. Taamaammat IA teknikkikkut suleqatigaat, tamannalu marlunnik ilaasortaaffigisaqalissutigaat.

-Ilaasortaaffivut marluusut naammagisariaqarpagut, aamma naammagivagut. Naalakkersuisooqatigisimasatsinnut pitsaasumik attaveqaannarnerput soorunami pitsaassuuvoq. Piviusorli tassaavoq, ataatsimiititaliani ilaasortaaffiit pissarsiarisavut amerlagisassanngikkaluartut ataatsimiititaliani allani suliarineqartut isummersorfiginngitsoornaviannginnatsigit, tamannalu qilanaarivarput, Palle Christiansen knr.gl-imut nassuiaavoq.

Demokraatit naalakkersuisuutitaqarsimanerat taasinernik akeqarsimavoq, liberalillu pingaartitaat Demokraatit tapersersorluarneqarnerinut pissutaasimasut sulissutigeqqinneqartussanngorput. Nammineq isummat illersornissaannut piffissanngorpoq, tamannalu Palle Christiansenip qilanaarinerarpaa.

-Siunnersuuterpassuavut naalakkersuisooqatigiit ataatsimut politikkiannut ilanngunneqanngitsoortut amerlasuupilussuusimapput, aamma Naalakkersuisuusimasuni Demokraatit politikkiat inuppassuarnit ujartorneqarsimavoq. Piffissami aggersumi ilaatigut namminersorlutik inuussutissarsiuteqartut, ilinniartitaanerit, nammineq illuutillit inuussutissarsiutinillu siuarsaaneq pillugit isummavut oqaluttuarisussanngorpagut. Demokraatini isumalorujuuinnarluni uninngaannarnavianngilagut, Palle Christiansen neriorsuivoq.