Pisortat pisiniarnerminni siammasinnerpaamik atuisarnissaannut Nusuka kaammattuuteqarpoq
Lyngep ingerlatsiviit soorlu TELE-POST, KNI, Royal Greenland, INI aamma Royal Arctic Line tamatumani eqqaavai. Ingerlatsiviit taakku allaffimmi atortussanik, atisanik, pilerisaarutinik, biilinik, sanaartornermik nutarterinermillu suliassanik aningaasarpassuit atorlugit ukiut tamaasa pisiniartarput.
Suliffeqarfinni nunaqavissunik sulisoqarnerpaaffiusuni aammalu ilinniartoqarfiulluartuni pisiniartoqartarnissaanut Gerth Lynge kajumissaarivoq. Nusukap siulittaasuata aamma suliffeqarfiit ilisarisimaneqarneri piinnarlugit atuisoqartannginnissaanut aamma kajumissaarivoq.
- Aqqutissat ilagivaat pinngitsoorani suliassat,pisiassat 50.000 kroonit tungaanut naleqarpata taava suliffeqarfiit minnerpaamik marluk aperineqassapput aammalu suliassat, pisiassat 500.000 kroonit sinnerpatigit tamanut ammasumik suliariumannituussarsiunneqassapput tamatigut. Taamatut iliornermi pingaaruteqarpoq akimik tunisisut najuutsillugit piffissaq aaliangersimasumi neqeroorutit tamakkiisumik ammarneqartarnissaat, Gerth Lynge nassuiaavoq.
Gerth Lyngep erseqqissaatigaa suliffeqarfiit aalajangersimasut Nusuka tungaanit uparuarniarneqanngitsut, nioqqutinilli kiffartuussinermilu pisinermi suliffeqarfiit nunaqavissunik sulisoqartut aammalu ilinniartoqartut atornissaannik kajumissaaruteqaannartoq.