Pisortat naartusunut iliuuserisartagaat SIK-mit isornartorsiorneqartut

- Ajornartorsiutip annertussusaa eqqarsaatigalugu tamassuma annikitsortaannaa taamaallaat ilisimavarput, sulisartut kattuffiata eqqartuussissuerisua, Lissi Olsen, aviisimut Atugagdliutinut oqarpoq.

Nunatta Isiginnaartitsisarfiani sulisup, erninerminut atatillugu sulinngiffeqarnerani taassuma akissarsiassaasa akilerneqannginnerinut suliaq, Nunatta Eqqartuussiviani qanittukkut suliarineqarpoq, akissarsiassaalu tunniunneqarlutik.

- Taanna taama misigisaqarsimasoq kisiartaanngilaq tassami erninermut atatillugu sulinngiffeqarnermi akissarsitinneqanngitsoornerit SIK-mut suliakkiutigineqartut, ukioq mannaannaq pingasut suliassanngortinneqarput, Atuagagdliutinut Lissi Olsen oqarpoq.

Suliakkiutigineqartut ilaat tassaallutik meeqqerivimmi oqartussat suliffeqarfiani ukiorpassuarni sulisoq ataaseq aamma pisiniarfimmi namminersortumi sulisoq ataaseq.

SIK-p eqqartuussisuserisua oqarpoq, erninermut atatillugu sulinngiffeqartarnerit inatsisit malillugit atuutsinneqartannginnerinut pissuttaasoq tassaammat, Namminersorlutik Oqartussat suliffeqarfiinit taamatullu kommuninit tamakku taamaallaat suliarineqartarmata.

Inatsisit ilisimaneqannginnerat tupigusuutigineqartoq

Lissi Olsenillu tupiginerpaavaa, meeqqerivinni sulisut pisortaasa arnat, erninermut inatsisit ilisimaneq ajormatigit.

- Taakku erninermut atatillugu pisinnaatitaaffeqartoqarnersoq ilisimasimasimagunanngilaat, Lissi Olsen oqarpoq.

SIK-mit maanna pilersaarutigineqarpoq, erninermut atatillugu inatsisinillu unioqqutitsisoqartillugu tunngavilersuinikkut akiliisitsisalernissamik.

- Taama pisoqartillugu akiliisitsiniartarnissarput isumaliutigaarput, tassami pisortat suliffeqarfiutaat inatsisinik isumaqatigiissutinillu akisussaasuullutik immikkoortortanut mikisunut akisussaaffimmik tunniussisarnerat inatsisinut naapertuutinngimmata, Lissi Olsen Atuagagdliutinut oqarpoq.