Pisortaqarfimmi pisortaq: Sila pillugu suli isumaqatigiittoqanngilaq
Aviisimi allaaserisat naapertorlugit sila nukissiuutillu pillugit Danmarkimi ministerip, Lykke Friisip, Venstremeersup, aamma Naalakkersuisut siulittaasuata, Kuupik Kleistip, isumaqatigiissut nalunaaqutaq marlunut Bella Centerimi atsiussavaat.
Isumaqatigiissut qanorpiaq imaqarnersoq ullup ingerlanerani aatsaat paasinarsissaaq. Sermitsialli tusarfii naapertorlugit imaakkunarpoq, silap pissusaata allanngoriartornera pillugu isumaqatigiissutissamut piumasaqaatit amerlanersaat Kalaallit Nunaata Danmarkimut isumaqatigiissutigisimagai.
Kalaallit Nunaat Danmarkilu sila pillugu isumaqatigiissuteqarsimanersut maanngaaniit ullaanerani paasiniaqqissaarparput, KNR-illu paasisai malillugit isumaqatigiissuteqartoqarsimanngilaq.
Ineqarnermut, Attaveqaqatigiinnermut Angallannermullu Pisortaqarfimmi pisortaq, Nunatsinniillu isumaqatigiinniartunut peqataasoq, Steffen-Ulrich Lynge, Radioaviisimut toqqaannartumik oqarpoq, Sermitsiap ilisimatitsissutai eqqunngitsut.
- Isumaqatigiinniarnerit naammassitinnagit Danmarkimut isumaqatigiissuteqaraluarutta tamanna atorsinnaanngilaq, Steffen-Ulrich Lynge oqarpoq.
Pisoq KNR-imiit qanimut malinnaavigeqqissaasavarput.
