Pisortaq Pituffimmi kiffartuussinissamut isumaqatigiissut pillugu: Kalaallit Nunaata iluaqutigissavaa
Nunatsinni suliffeqarfik Inuksuk A/S amerikamiut Pituffimmi sakkutooqarfiani tamarmi 2034-p tungaanut kiffartuussisuussasoq, USA-p Københavnimi aallartitaqarfia arfininngormat nalunaarpoq. Isumaqatigiissut taanna ukiuni tulliuttuni aqqaneq-marlunni atuuttussaq 27,7 milliardit koruuninik naleqarpoq.
Pituffimmi kiffartuussinissamut isumaqatigiissut 2014-imi atuutilerpoq.
USA-p Amerikami suliffeqarfik Vectrus Services taamanikkut isumaqatigiissusiorfigaa.
Tamanna sioqqullugu Danmarkip Kalaallit Nunaallu Pituffimmi ukiorpassuarni kiffartuussisuupput. Isumaqatigiissut taanna nunatta karsiata ukiumut 200 millionit koruunit missaannik isertitaqaatigisarpaa.
Illersornissamulli isumaqatigiissut naapertorlugu danskit kalaallillu suliffeqarfiutaat kiffartuussinissamut isumaqatigiissuteqarfigineqartussaapput.
Taamaammat kunngeqarfik naapertorlugu USA-p Vectrus Servicesimut 2014-imi isumaqatigiissusiornera USA-p kunngeqarfiullu isumaqatigiissutaannik unioqqutitsineruvoq.
Vectrus Services 2024-p tungaanut isumaqatigiissuteqarfigineqarpoq.
Inuksuk A/S-ip pisortaanerata, Jeppe Bloch Steffensenip, isumaqatigiissut taanna naammagisimaaqaa. Taanna isumaqatigiissummut tunngatillugu isumagannaagassat tamarmik isumannaartinnagit apersorneqarusunngilaq, isumaqarlunili isumaqatigiissut taanna nunatta iluaqutigiumaaraa.
- Uagutsinnut Kalaallit Nunaannullumi iluaqutaasussamik sivitsuuttoortumik isumaqatigiinniarnerup kiisami naammassineqarnera oqiliallaatigalugulu naammagisimaaqaarput, taanna KNR-imut allappoq.
Aamma nunanut allanut tunngasuni ministerinngoqqammertup, Lars Løkke Rasmussenip (M), isumaqatigiissutip inernera naammagisimaarpaa.
- Amerikamiut Pituffimmi sakkutooqarfiup Kalaallit Nunaannut inuinullu sapinngisamik iluaqutaanissaata qulakkeernissaa isumaqatigiinniarnerni siunertaavoq. Tamannalu isumaqatigiissummi iluatsittoq isumaqarpunga, taanna Ritzauimut akissummini allappoq.
Suliffissaqartitsinissamik ilinniarfissaqartitsinissamillu periarfissiilluassasoq
Inuksuk A/S-ip Pituffimmi kiffartuussinermi, tassa ingerlatsinermi aserfallatsaaliinermilu, suliassani 2023-p aallartinnerani aallartissinnaassallugit tamakkiisumillu 2023 oktobarip aallaqqaataani tigusinnaassallugit naatsorsuutigigaa, USA-p Københavnimi aallartitaqarfia tugassiuutinut nalunaarpoq.
Lars Løkke Rasmussenip kiffartuussinissamut isumaqatigiissutitaaq suliffissaqartitsinissamik ilinniarfissaqartitsinissamillu periarfissiilluassangatikkaa, Ritzau allappoq.
Inuksuk A/S-ip CSR-ilerinermi pingaarnertut suliniutaa tassaasoq, 'Greenland First', suliffeqarfik taanna tusagassiuutinut 2022-mi maajimi nalunaarpoq. Suliffeqarfiit inuiaqatigiinni qanoq akisussaaqataanersut, CSR-ilerinermi suliniutini ersertarpoq.
- Kalaallit Nunaanni peqatigiiffinnik atassuteqarluarnissaq, nunaqavissunik sulisussarsiornissaq, inuussutissarsiornermik ilinniarfinnik suleqateqarnissaq taavalu nunaqavissunik aalaakkaasunik pikkorissaanikkut atorfinitsitsinikkullu taakkua piginnaasaannik qaffassaanissaq CSR-ilerinermi suliniumminni ukkanniaritsik, Inuksuk A/S allappoq.
Kalaallit Nunaanni suliffeqarfinnik pilersuisoqarnissartik, niueqateqarnissartik nassiussalerisoqarnissartillu pingaartikkitsik, Inuksuk A/S tusagassiuutinut nalunaarummini aamma allappoq.
