Pisortaq: Aarhusimi eqqissiviilliortoqarnera kalaallinut tunngassuteqanngilaq

Nakkutilliisoqarfiup Aarhusimi Klostertorvimi aasap ingerlanerani toqqissisimatitsiniarnissaanik suliakkerneqarsimanera inuit attaveqaqatigiittarfiini oqallisaasupilussuuvoq.

Ekstra Bladetip allaaserisaqarnerata kingorna tamanna pivoq, ilaatigut Aarhus Cityforeningimi pisortap, Claus Bechip, apersorneqarluni oqaatigimmagu "kalaallit aalakoortut naleqqutinngitsumillu pissusilersortut" ajornartorsiutaasut ilagigaat.

Tamannali eqqunngilluinnartoq Claus Bechip KNR-imut oqaatigaa.

- Kalaallit ajornartorsiutaanngilluinnarput. Ekstra Bladetimit eqqunngitsumik issuarneqarpunga. Naleqqutinngitsumik pissusilersortunik oqarama kalaallit immikkut pinngilluinnarpakka. Kalaallit (Klostertorvimiittartut, aaqq.) nalinginnaasumik pitsaasumik pissuseqartuupput. Taakku ajornartorsiutaanngivipput. Sunniutilittaasut allaapput.

Claus Bech nassuiaavoq Ekstra Bladetimit apersorneqarnermi kingorna tusagassiortoq oqarasuaatikkut attaveqarfigisimallugu innuttaasut kalaallit pineqannginnerat erseqqissaatigalugu.

Ukiorpassuarni ajornartorsiutaasoq

Aarhusimi Klostertorvi innuttaasunit inooqataanikkut ajornartorsiortunit ukiorpassuarni katersuuffigineqartarpoq.
Tamannalu ingammik illoqannginnersami cafénut silami sassaalliuteqartartut pisiniartuinut illoqannginnersamilu bussit unittarfiini marluusuni utaqqisunut eqqissiviilliuutaasarpoq.

Eqqissiviilliortoqartarneralu pisortat tungaannit arlaleriarlugu iliuuseqarfiginiarneqareersoq, Aarhusip Kommunia, Kirkens Korshær, Aarhus Cityforening, angerlarsimaffeqanngitsut nuna tamakkerlugu kattuffiata SAND politiillu peqatigiillutik aalajangersimapput nakkutilliisoqarfimmut namminersortumut suliakkiissutigineqassasoq.

- Inooqataanikkut ajornartorsiortut assigiinngitsupilussuupput. Sunniutilittaasulli tassaapput ikiaroornartuerniat ikiaroorajuttullu, kiisalu inuit qassikattannguit ajoraluartumik isumaginninnikkut ikiorserniaraluarlugit ikioruminaatsuusut.

Inooqataanikkut ajornartorsiortut toqqissisimatinniarneqassasut

Nakkutilliisut assersuutigalugu illoqannginnersamit inunnik peersitsinissaminnut pisinnaatitaanngillat, pinaveersaartitsissallutilli ajornartorsiuteqarpallu politiinik aggersaasassallutik.

Inooqataanikkummi ajornartorsiortut toqqissisimanissaat matumani aamma pineqarpoq. Nakkutilliisut aamma ini kialaarfik Kirkens Korshærimit ingerlanneqartoq illoqannginnersap eqqannguaniittoq ornittassavaat.

- Inooqataanikkut ajornartorsiortut illoqannginnersamiittartut ilarpassuisa akunnerminni toqqissisimasannginnerat aamma siumugassaasarpoq. Taamaammat nakkutilliisut aamma isumagisassarissavaat taakku toqqissisimanerulersinniassallugit. Taamaammat suliassaq marloqiusaavoq. Inuit immikkoortut assigiinngitsut akornanni eqqissisimasumik pissuseqartoqarnissaa aamma qulakkeerniarneqassammat.

Nakkutilliisoqartitsinermik aaqqissuussineq aallaqqaammut misiliutaannartut ingerlanneqassaaq. Maajip aallaqqaataanit aggustip 31-ata tungaanut, ataasinngornermit arfininngornermut, piffissami ullup qeqqanit unnukkut arfineq-marluk tungaanut.

KNR-ip Ekstra Bladet attaveqarfigaa. Claus Bech kukkusumik issuarneqarsimasoriguni attaveqaqqullugu aviisip kajumissaarpaa.