Kalaallit Illuutaat Aarhusimiittoq kultureqarnermut immikkoortortaqarfittaartoq
Kultureqarnermut immikkoortortaqarfittaaq marlunnik sulisoqarallarpoq, taakkulu kulturerput oqaluttuarisaanerpullu pillugu paasissutissiisarneq peqataaffigissavaat.
- Aarhusimi nunallu immikkoortuani kalaallinut uummaarissumik avatangiiseqartitsinissaq siulersuisut siunertaraat, Aarhusimi Kalaallit Illuutaanni pisortaq, Jørn Holbech, KNR-imut taama oqarpoq.
Kalaallit illuat ukiortaap kingorna allanngorteriffiuvoq, kultureqarnermullu immikkoortortaqarfimmik ammaasoqarnerata saniatigut sulisunik marlunnik atorfinitsitsisoqarpoq ataaserlu suliunnaarluni.
AAMMA ATUARUK Kalaallit Nunaat kulturikkut pikialaartitsinermi Aarhusimi peqataavoq
Pitsaasut isiginiarneqassasut
Aaqqissuussinerit arlaqanngitsut maannamut pilersaarutaapput, ilaatigut maajip qaammataani minifestivalertitsinissaq, juunip qaammataani Inuiattut ullorsiortitsineq septembarillu qaammataani suliffeqarfinnik aallarnisaaneq inuussutissarsiornerlu pillugit isumasioqatigiissitsinissaq. Tamakku saniatigut kalaallit illuata Aarhusip 2017-imi Europami kulturikkut illoqarfiit pingaarnersaattut inissisimanera peqataaffigaa.
Allanilli aamma aaqqissuussisoqarnissaa naatsorsuutigineqassasoq Jørn Holbechip oqaatigaa. Danskillu tusagassiorfiisa immikkut peqataanissaat neriuutigineqarpoq Nunatsinnit oqaluttuanik nuannersunik kulturikkullu sulianik amerlanerusunik saqqummiussisoqarnissaa neriuutigineqarluni.
- Oqaluttuat nuannersut ingerlateqqittariaqarpagut. Kalaallit maani najugaqartut oqaluttuassallit, soorunami aamma Kalaallit Nunaanneersut atussavagut. Danskit ilisimasakinnerannik imaluunniit isummanik pigiliutiinnagaannik allanngortitsinissaq taamaalilluta peqataaffigissavarput, Jørn Holbech taama oqarpoq.
Ilinniagaqartut peqataatinneqassasut
Taamatullu suliaqarneq kalaallit ilinniagaqartut Aarhusimi Region Midtjyllandimilu najugaqartut aamma peqataaffigisinnaavaat.
Ilaatigut inuussutissarsiornikkut kulturikkullu periusissiaq, Nukiga, Kalaallit Illuata Aarhusimiittup siorna aallartitaa aqqutigalugu.
- Ilinniagaqartut kalaallit illuannut attuumassuteqartut Nukigamut ukiuni tulliuttuni peqataatinneqassaapput. Food Festival ukiuni kingullerni ingerlattarparput, taannalu ilinniagaqartut kajumissutsiminnik suleqataaffigisarpaat. Tamannalu annertusarneqassaaq, aaqqissuussinerit allat aamma kajumissutsiminnik suleqataasunik peqataaffigineqartalerlutik, Jørn Holbech oqarpoq.
Nunatsinni siunissami inuussutissarsiornikkut periarfissat pillugit Kalaallit Illuutaat aamma Nukiga Aarhusimi Dokk1-imi pingasunngornermi oqallitsitsissapput.
